ཕྱི་ལོ་ ༢༠༠༨ ལོའི་ས་བྱི་ཞི་རྒོལ་ཆེན་མོ་ནི་བོད་མིའི་རང་དབང་འཐབ་རྩོད་ཀྱི་ལོ་རྒྱུས་ཀྱི་དཀྱོག་འཚམས་ཤིག་ཡིན་པ་དང་། དེ་ནི་རྒྱ་ནག་གཞུང་གིས་བཤད་པ་ལྟར་དར་དམར་འོག་འཚར་ལོངས་བྱུང་བའི་བོད་ཀྱི་མི་རབས་གསར་པས་སྣེ་ཁྲིད་བྱས་པ་ཞིག་ཆགས་ཡོད་ཅིང། ངོ་རྒོལ་གྱི་གྱེན་ལངས་དེ་ནི་1959དགུའི་གྱེན་ལངས་ཆེན་མོའི་རྗེས་ཀྱི་གཞི་ཁྱོན་ཆེ་ཤོས་དང་དུས་ཡུན་རིང་ཤོས་ཤིག་ཀྱང་ཆགས་ཡོད་ཅིང་། གྱེན་ལངས་དེ་དང་འབྲེལ་བའི་གནས་ཚུལ་མཁོ་སྒྲུབ་དང་ཕྱོགས་བསྒྲིགས་བྱ་རྒྱུ་དེ་ཧ་ཅང་གི་གལ་ཆེན་ཡིན་པར་བརྟེན། འདི་ག་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་ངོས་ནས་ཀྱང་བོད་ནང་གི་ཞི་རྒོལ་གྱེན་ལངས་དང་འབྲེལ་བའི་གནས་ཚུལ་མཁོ་སྒྲུབ་དང་ཕྱོགས་བསྒྲིགས་བྱ་རྒྱུ་དེ་གལ་ཆེར་ངོས་འཛིན་བྱས་ཏེ་ད་ལམ་གྱི་དེབ་འདི་དཔར་སྐྲུན་བྱས་པ་ཡིན།
དེབ་འདིའི་རྩོམ་པ་པོ་དང་དེ་རིང་གི་བགྲོ་གླེང་འདིའི་ཐོག་ དྲ་ཐོག་ནས་མཉམ་ཞུགས་གནང་མཁན་ཚང་མ་ས་བྱིའི་ཞི་རྒོལ་ཆེན་མོའི་འཐབ་རྩོད་ ནང་ དངོས་སུ་མཉམ་ཞུགས་བྱེད་མྱོང་མཁན་གྱི་ལོ་རྒྱུས་ཀྱི་དཔང་མི་ ཤ་སྟག་ཡིན་པར་བརྟེན། ཁོང་རྣམས་ཀྱིས་དེ་རིང་གི་ཐད་གཏོང་རྒྱང་བསྲིངས་ཀྱི་ལེ་ཚན་འདི་བརྒྱུད་ནས་སྐབས་དེའི་དངོས་བྱུང་གི་གནས་ཚུལ་དང་སོ་སོ་སོ་རང་ཉིད་ཀྱི་ལུས་ཐོག་ ཏུ་ མྱངས་པའི་དཀའ་ཚེགས་ཆེ་བའི་ལོ་རྒྱུས་ཀྱི་བདེན་དཔང་ དེ་དག་ ངོ་སྤྲོད་གནང་རྒྱུ་ཡིན་པས་ དེས་ ང་ཚོའི་འཐབ་རྩོད་ལ་བློ་སྐྱེད་གསར་པ་ལེན་རྒྱུར་ཐེ་ཚོམ་མེད་ལ། ལྷག་པར་དུ་དེབ་འདིའི་རྩོམ་པ་པོ་འཛུམ་ཤུལ་འཇམ་དབྱངས་ཐབས་མཁས་ལགས་ནས་ཕྱི་ལོ་ ༢༠༠༨ ལོར་མདོ་སྨད་བླ་བྲང་བཀྲིས་འཁྱིལ་དུ་རྒྱ་གཞུང་ལ་ཞི་བའི་ངོ་རྒོལ་གྱི་སྣེ་ཁྲིད་བྱས་པའི་རྒྱུད་རིམ་དང་རྒྱབ་ལྗོངས། རྒྱ་དམག་གིས་དགོན་པར་སྔོག་བཤེར་དང། གྲྭ་དམངས་འཛིན་བཟུང་བྱས་པའི་གནས་ཚུལ་དེ་དག་སྐབས་དེའི་དངོས་ཡོད་ཀྱི་གནས་ཚུལ་གཞི་རྩར་བཟུང་ནས་ལོ་རྒྱུས་ཀྱི་དེབ་ཐེར་ནང་ འགོད་གནང་ མཛད་ཡོད་པ་མ་ཟད། དེ་བཞིན་དུ་ རང་ལུས་མེར་སྲེག་གཏོང་མཁན་གྱི་དཔའ་དཔའ་མོ་མང་པོ་ཞིག་གི་མཚན་གཞུང་དང་ས་གནས། དུས་ཚོད་སོགས་གསལ་པོར་འགོད་གནང་མཛད་པར་ ལེགས་གསོའི་ བསྔགས་བརྗོད་ཞུ་བཞིན་ཡོད།
མདོར་ན། དེབ་འདི་ནི་བོད་མིའི་རང་དབང་འཐབ་རྩོད་ཀྱི་ལོ་རྒྱུས་སྤྱི་དང་། ལྷག་པར་དུ་ས་བྱི་ཞི་རྒོལ་ཆེན་མོའི་སྐབས་མདོ་སྨད་བླ་བྲང་བཀྲིས་འཁྱིལ་དུ་བྱུང་བའི་ཞི་རྒོལ་འཐབ་རྩོད་ལ་ཞིབ་འཇུག་བྱེད་པའི་ལོ་རྒྱུས་ཀྱི་དཔྱད་གཞི་ གལ་ཆེན་ཞིག་ཆགས་ཡོད་སྟབས། བོད་མི་ཚང་མས་འདི་དང་འདི་ལྟ་བུའི་དཔེ་དེབ་ཀྱི་རིགས་ལ་ངེས་པར་དུ་བལྟ་ཀློག་ བྱེད་དགོས་པའི་འབོད་སྐུལ་ཞུ་བཞིན་ཡོད།
