དེ་རིང་ཟླ་ ༦ ཚེས་ ༤ ཉིན་འདི་ག་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་ངོས་ནས་ཕྱི་ལོ་ ༢༠༢༥ ལོའི་ལོ་འཁོར་སྙན་ཐོ་( བོད་ཡིག་དང་། དབྱིན་ཇི། རྒྱ་ཡིག)དང་། དེ་བཞིན་ཕྱི་ལོ་ ༢༠༡༢ ལོ་ནས་ཕྱི་ལོ་ ༢༠༢༥ ལོ་བར་གྱི་བོད་ནང་གི་ཆོས་དད་རང་དབང་གི་དམིགས་བསལ་སྙན་ཐོ་བཅས་དེབ་གཉིས་འགྲེམས་སྤེལ་ཞུས་ཡོད། ཞིབ་ཕྲའི་གནས་ཚུལ་ང་ཚོའི་དྲ་གནས་ཐོག་ནས་གཟིགས་ཐུབ་ཀྱི་ཡོད།
ཕྱི་ལོ་ལོ་ ༢༠༡༢ ལོར་ཞི་ཅིང་ཕིང་རྒྱ་ནག་གི་དབང་འཛིན་པ་མཐོ་ཤོས་སུ་སླེབས་རྗེས་རྒྱ་ནག་གཙོ་བོ་བྱས་པའི་གྲངས་ཉུང་མི་རིགས་ཀྱི་སྲིད་ཇུས་ལའང་བཟང་ཕྱོགས་ཀྱི་འགྱུར་བ་ཞིག་ཡོང་བའི་རེ་བ་བྱས་ཡོད་ཀྱང་། བཟང་ཕྱོགས་ཀྱི་འགྱུར་བ་ཡོང་རྒྱུའི་ཚབ་ལ་ཇེ་ཞན་ཇི་སྡུག་ཏུ་སོང་ཡོད་ཅིང་། འདས་པའི་མི་ལོ་བཅུ་གྲངས་གཅིག་ལྷག་ཙམ་གྱི་དུས་ཡུན་དེ་ནི་རིག་གནས་གསར་བརྗེ་གཉིས་པ་ལྟ་བུར་ངོས་འཛིན་བྱེད་ཀྱི་ཡོད་པ་མ་ཟད། སྐབས་ལ་ལར་རིག་གནས་གསར་བརྗེ་ལས་ཀྱང་སྡུག་རྩུབ་ཆེ་བ་ཆགས་ཡོད། རིག་གནས་གསར་བརྗེའི་སྐབས་ཀྱི་སྲིད་ཇུས་ཀྱི་ངོ་བོ་དེ་རྙིང་བཞི་རྩ་གཏོར་ཞེས་བསམ་བློ་རྙིང་པ་དང་། རིག་གནས་རྙིང་པ། གོམས་གཤིས་རྙིང་པ། ལྟ་བ་རྙིང་པ་རྩ་མེད་བཟོ་རྒྱུ་ཡིན་ཀྱང་། སྐབས་དེ་དུས་ད་ལྟ་ནང་བཞིན་ཚན་རིག་ལག་རྩལ་གྱི་ཚད་གཞི་མཐོ་པོ་མེད་སྟབས། འཕྲུལ་ཆས་ཀྱིས་མི་ལ་དབང་བསྒྱུར་དང་སྟངས་འཛིན་བྱེད་པའི་ནུས་པ་དེ་མེད། ཡིན་ནའང་། དེང་སྐབས་ཚན་རིག་ལག་རྩལ་གྱི་ཆུ་ཚད་རྩེ་མོར་གསོན་ཡོད་སྟབས། རྒྱ་ནག་ལྟ་བུའི་སྲིད་དབང་སྒེར་གཅོད་པ་ཚོས་འཕྲུལ་ཆས་ལ་བརྟེན་ནས་མིའི་བསམ་བློར་དབང་བསྒྱུར་དང་སྟངས་འཛིན་བྱེད་པ་དེ་ནི་འཇིགས་སུ་རུང་བ་ཞིག་རེད།
ལྷག་པར་དུ་བོད་ཀྱི་རིས་མེད་དགོན་སྡེ་ཁག་དང་ལྷ་ཁང་། དེ་བཞིན་དགོན་པའི་འདུ་ཁང་དང་གྲྭ་ཤག་དང་བཅས་པ་ཡོད་ཚད་ལ་བརྙན་མིག་བཙུགས་ཏེ་གྲྭ་བཙུན་གྱི་འགྲོ་འདུག་སྤྱོད་གསུམ་ཚང་མ་ལྟ་སྲུང་འོག་གནས་ཡོད་ཅིང་། ཞི་ཅིང་ཕིང་གིས་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་ཟབ་ཏུ་གཏོང་དགོས་པ་དང་། ཆོས་ལུགས་ཀྲུང་གོ་ཅན་གྱི་ཁ་ཕྱོགས་རྒྱུན་འཁྱོངས་བྱེད་དགོས་པ། རྒྱལ་ཁབ་གཅིག་གྱུར་གྱི་སྐད་ཡིག་ལ་སློབ་སྦྱོང་བྱེད་དགོས་པའི་སྲིད་ཇུས་གཏན་འབེབས་བྱས་པ་དེས་གྲྭ་བཙུན་རྣམས་རྟག་པར་ཕྱོགས་གཅིག་ནས་ཆབ་སྲིད་སློབ་སྦྱོང་བྱེད་དགོས་པ་དང་། ཕྱོགས་གཞན་ཞིག་ནས་རྒྱལ་ཁབ་གཅིག་གྱུར་གྱི་སྐད་ཡིག་ཏེ་རྒྱ་སྐད་རྒྱ་ཡིག་སློབ་སྦྱོང་བྱེད་དགོས་པའི་གཏན་འབེབས་བྱས་ཡོད།
དེར་བརྟེན། ད་ཐེངས་ཀྱི་སྙན་ཐོ་འདིའི་ནང་འདས་པའི་ལོ་ངོ་བཅུ་གྲངས་གཅིག་གི་ལྷག་ཙམ་གྱི་རིང་རྒྱ་ནག་གཞུང་གིས་བོད་མིའི་ཆོས་དད་རང་དབང་བཙན་འཕྲོག་བྱེད་སྟངས་དང་། སྲིད་ཇུས་ཀྱི་གཏན་འབེབས། ལག་ལེན་གྱི་གོ་རིམ་བཅས་རྒྱ་བཤད་བྱས་ཡོད་པ་མ་ཟད། ད་དུང་རྒྱ་ནག་གཞུང་གི་རྩ་ཁྲིམས་དང་བཅའ་ཁྲིམས་ཀྱི་ནང་ཆོས་དད་རང་དབང་འགན་སྲུང་ཡོད་སྐོར་གཏན་འབེབས་བྱས་ཡོད་ཀྱང་། རྩ་ཁྲིམས་དང་བཅའ་ཁྲིམས་ནང་གི་ཐོབ་ཐང་དེ་དག་རྣམ་པ་གཞན་ཞིག་གི་ཐོག་ནས་བཙན་འཕྲོག་བྱེད་པའི་ཐབས་ལམ་ཇི་ལྟར་བཟོས་ཡོད་པ་ཡང་གསལ་སྟོན་བྱས་ཡོད་སྟབས། སྙན་ཐོ་འདིས་བོད་མིའི་ཆོས་དད་རང་དབང་ལ་དོ་སྣང་དང་ཉམས་ཞིབ་བྱེད་མཁན་ཚོར་ཆ་མཚོན་ན་དཔྱད་གཞི་ཡོང་ངེས་ཡིན་པ་མ་ཟད།སྙན་ཐོ་འདིའི་ནང་ལུང་འདྲེན་བྱས་པའི་གནས་ཚུལ་གྱི་འབྱུང་ཁུངས་དག་ཀྱང་བརྒྱ་ཆ་དགུ་བཅུ་ཡན་རྒྱ་ནག་གཞུང་གིས་འདོན་སྤེལ་བྱས་པའི་དུས་དེབ་དང་། ཚགས་པར། དྲ་ཚིགས་བཅས་ལ་གཞི་བཅོལ་ནས་ཁུངས་སྐྱེལ་བྱས་ཡོད།
