རྒྱ་གཞུང་གིས་སྟོན་པའི་སྐུ་བརྙན་དང་ནང་བསྟན་སློབ་གླིང་གཏོར་བཤིག་བཏང་རྗེས་བྲག་མགོར་དམ་དྲག་ཇེ་ཆེར་གཏོང་བཞིན་འདུག

འདི་ག་བོད་ཀྱི་འགྲོ་བ་མིའི་ཐོབ་ཐང་དང་མང་གཙོའི་འཕེལ་རྒྱས་ལྟེ་གནས་ཁང་དུ་ཁུངས་ལྡན་གྱི་གནས་ཚུལ་འབྱོར་བ་ལྟར་ན་བྲག་མགོ་རྫོང་སྲིད་གཞུང་ལས་ཁུངས་ནས་འདས་པའི་ཟླ་བ་གཅིག་གཉིས་ཙམ་གྱི་ནང་དུ་བྲག་མགོ་དགོན་པའི་ཉེ་འདབས་སུ་ཡོད་པའི་བྲག་མགོ་ནང་བསྟན་སློབ་གླིང་དང་མ་ཎིའི་ལག་འཁོར། ཕི་ཊི་ ༩༩ ཙམ་ཡོད་པའི་སྟོན་པའི་སྐུ་བརྙན་བཅས་གཏོར་བཤིག་བཏང་བ་མ་ཟད་གང་སར་དམག་མི་དང་ཉེན་རྟོག་པ་འགྲེམ་འཇོག་གིས་བོད་མི་ཚོའི་འགྲོ་འདུག་སྤྱོད་གསུམ་དང་དྲྭ་ལམ་གྱི་བྱ་སྤྱོད་སོགས་ལ་དོ་དམ་བྱེད་ཤུགས་སྔར་ལས་ཀྱང་ཇེ་ཆེར་གཏོང་བཞིན་ཡོད་པ་རེད།