Privacy Policy

བསྒྲུབ་བྱའི་དོན་གནད།

བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་བོད་ནང་གི་འགྲོ་བ་མིའི་ཐོབ་ཐང་སྲུང་སྐྱོབ་ཆེད་ལས་འགུལ་སྤེལ་བ་དང་། ཐོབ་ཐང་དོན་གཉེར་བ་རྣམས་ཀྱི་ནུས་སྟོབས་གོང་སྤེལ་གཏོང་བ། བོད་མི་ཚོའི་འགྲོ་བ་མིའི་ཐོབ་ཐང་ལ་རྟོག་ཞིབ་ནན་པོ་བྱས་ནས་ཡིག་ཚགས་སུ་འགོད་པ་དང་སྙན་ཐོ་འདོན་པ་སོགས་བྱེད་པ་བརྒྱུད་བོད་ཕྱི་ནང་གཉིས་ཀའི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་གཏོང་ཐབས་ལ་ཧུར་བརྩོན་ཞུ་བཞིན་ཡོད།

དམིགས་ཡུལ།

བོད་མི་ཡོངས་ཀྱིས་འགྲོ་བ་མིའི་ཐོབ་ཐང་དང་མང་གཙོའི་རང་དབང་རྣམས་ཚུལ་བཞིན་ལོངས་སུ་སྤྱོད་ཐུབ་པའི་དུས་བཟང་ཞིག་འཆར་བའི་དམིགས་ཡུལ་བཅངས་ཡོད།

Tibetans holding candles

རིན་ཐང་།

འདྲ་མཉམ། འཚེ་མེད་ཞི་བ། དྲང་གཞག ཆེ་མཐོང་། ནུས་སྟོབས་གོང་སྤེལ། སྙིང་སྟོབས།

ང་ཚོའི་ལོ་རྒྱུས།

བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་ནི་རྒྱ་གར་བྱང་ཕྱོགས་རྡ་རམ་ས་ལར་ཆགས་པའི་བོད་མིའི་འགྲོ་བ་མིའི་ཐོབ་ཐང་གི་ཚོགས་པ་ཐོག་མ་དེ་ཡིན། ཕྱི་ལོ་ ༡༩༩༦ ལོའི་ཕྱི་ཟླ་དང་པོའི་ནང་བཙུགས་ཤིང་རྒྱ་གར་གྱི་ཚོགས་སྡེ་དེབ་སྐྱེལ་བཅའ་ཁྲིམས་(ཕྱི་ལོ་ ༡༨༦༠)ཀྱི་དོན་ཚན་གཉིས་པ་ལྟར་ཁྲིམས་མཐུན་དེབ་སྐྱེལ་བྱས་ཟིན་པའི་ཚོགས་པ་ཞིག་ཡིན།

བློ་བཟང་སྙན་གྲགས་ལགས་ནི་ཚོགས་པ་འདི་འཛུགས་མཁན་གྱི་གྲས་དང་འཛིན་སྐྱོང་འགན་འཛིན་དང་པོ་དེ་ཡིན་ཞིང་ཁོང་གི་རྗེས་སུ་ཚེ་དབང་ལྷ་སྒྲོན་ལགས་དང་ཨོ་རྒྱན་བསྟན་འཛིན་ལགས།། ཕྱི་ལོ་ ༢༠༡༡ ནས་བཟུང་ད་ལྟའི་བར་ཚེ་རིང་མཚོ་མོ་ལགས་བཅས་ནས་འཛིན་སྐྱོང་འགན་འཛིན་གནང་དང་གནང་མུས་ཡིན།

དང་ཐོག་ལྟེ་གནས་ཁང་འདི་ཉིད་དབུས་བོད་མིའི་སྒྲིག་འཛུགས་(བཙན་བྱོལ་བོད་གཞུང་)ཕྱི་དྲིལ་ལས་ཁུངས་ཀྱི་ཚན་པ་ཞིག་ཡིན།

ཡིན་ན་ཡང་། ཕྱིས་སུ་གཞུང་འབྲེལ་མ་ཡིན་པའི་ཚོགས་པའི་ངོ་བོར་བསྒྱུར་ནས་རྡ་སར་ལས་ཁུངས་ལོགས་སུ་བཙུགས།

ལྟེ་གནས་ཁང་འདི་ཉིད་ད་ལྟའི་ཆར་སུད་སི་ཇེ་ནི་ཝར་(Geneva, Swiss)རྟེན་གཞི་བྱས་པའི་ མནར་གཅོད་འགོག་པའི་གོ་ལའི་ཚོགས་པ་ World Organisation Against Torture (OMCT) ཨེ་ཤི་ཡ་དང་ཞི་བདེ་རྒྱ་མཚོའི་མངའ་ཁུལ་གྱི་སྐྱབས་བཅོལ་བའི་ཚོགས་སྡེ་Asia Pacific Refugee Rights Network དང་ རྒྱལ་སྤྱིའི་འདུམ་འགྲིག་ཚོགས་པ་International Fellowship for Reconciliation (IFOR)སོགས་ཀྱི་ཚོགས་ཁུངས་སུ་ཚུད་ཡོད་པ་ཡིན། འདི་ག་ལྟེ་གནས་ཁང་གིས་འགྲོ་བ་མིའི་ཐོབ་ཐང་གི་ཚོགས་སྡེ་ཆེ་གྲས་གཙོས་འཛམ་གླིང་ཤར་ནུབ་ཀྱི་རྒྱལ་སྤྱིའི་ཚོགས་སྡེ་དང་གཙུག་ལག་སློབ་གྲྭ་ཁག་མང་དག་ཅིག་དང་ལྷན་དུ་མཉམ་ལས་བྱས་ཡོད།

ལྟེ་གནས་ཁང་འདི་ཉིད་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ལས་རིམ་དང་ཟུར་སྤེལ་ལས་རིམ་སོགས་སུ་མཉམ་ཞུགས་བྱེད་སྐབས་རྒྱལ་སྤྱིའི་འདུམ་འགྲིག་ཚོགས་པ་ IFORདང་ཉེན་གནས་སུ་ལྷུང་བའི་འགྲོ་བ་མིའི་ཚོགས་སྡེ་ Society for Threatened Peoples (STP)གཉིས་ནས་རྒྱུན་དུ་རྒྱབ་གཉེར་ཐོབ་བཞིན་ཡོད།

འགན་འཛིན་ལྷན་ཚོགས།

ཆོས་རྒྱལ་རིན་ཆེན་མཁའ་འགྲོ།

ཚོགས་གཙོ།

ཆོས་རྒྱལ་རིན་ཆེན་མཁའ་འགྲོ་ལགས་ནི་ཁམས་དཀར་མཛེས་སུ་འཁྲུངས་ཤིང་ཕྱི་ལོ་ ༡༩༥༩ ལོར་རྒྱ་གར་དུ་འབྱོར། རྡོ་རྗེ་གླིང་ Loreto College མཐོ་སློབ་ནས་ཉེ་བའི་གཙུག་ལག་རབ་འབྱམས་པ་ཐོན། ༧གོང་ས་མཆོག་གི་སྐུའི་གཅུང་པོ་བསྟན་འཛིན་ཆོས་རྒྱལ་ལགས་དང་གཉེན་སྒྲིག་གནང་། རིན་ཆེན་མཁའ་འགྲོ་ལགས་ནི་བོད་ཀྱི་བུད་མེད་ལྷན་ཚོགས་གསར་འཛུགས་གནང་མཁན་གྱི་གྲས་ཡིན་ཞིང་ཕྱི་ལོ ༡༩༨༤ ནས་བཟུང་ ༡༩༩༤ ལོར་བཀའ་བློན་ལ་མཚན་འདོན་མ་བྱུང་བར་དུ་བུད་མེད་ལྷན་ཚོགས་ཀྱི་ཚོགས་གཙོ་གནང་། ཁོ་མོས་དབུས་བོད་མིའི་སྒྲིག་འཛུགས་ཀྱི་ཤེས་རིག་བཀའ་བློན་གནང་སྟེ་རྒྱ་བལ་འབྲུག་གསུམ་དུ་ཡོད་པའི་བཙན་བྱོལ་བོད་མིའི་སློབ་གྲྭ་ཁག་གི་ཤེས་ཡོན་གོང་མཐོར་ཡོང་ཐབས་སུ་ཐུགས་འགན་ཟབ་བཞེས་གནང་མྱོང་། ད་ལྟའི་ཆར་ཁོང་གིས་བོད་ཀྱི་བུད་མེད་ལྷན་ཚོགས་ཀྱི་ཁྱབ་ཁོངས་འོག་བོད་ནས་ཡོང་བའི་བཙུན་མ་རྣམས་ཀྱི་སློབ་གཉེར་གཟིགས་སྐྱོང་དང་བཙུན་དགོན་གསར་འཛུགས་གནང་རྒྱུར་དམིགས་པའི་བོད་ཀྱི་བཙུན་མའི་ལས་འཆར་གྱི་འགན་འཛིན་གནང་མུས་ཡིན།

ཕུན་རབ་པ་བློ་བཟང་དར་རྒྱས།

ཚོགས་མི། 

ཕུན་རབ་པ་བློ་བཟང་དར་རྒྱས་ལགས་ནི་ཕྱི་ལོ་ ༡༩༣༧ ལོར་བོད་ཀྱི་རྒྱལ་ས་ལྷ་སར་འཁྲུངས། བོད་དུ་བཞུགས་སྐབས་བྲག་རྒྱབ་རིན་པོ་ཆེའི་ཞབས་ཞུ་དང་སྦྲགས་ཆོས་ཕྱོགས་ཀྱི་སློབ་གཉེར་གནང་། ཕྱི་ལོ་ ༡༩༥༩ ལོར་བཙན་བྱོལ་དུ་ཕེབས་ནས་ཀ་སྦུག་ཏུ་དབྱིན་ཡིག་སློབ་སྦྱོང་གནང་ཞོར་དུ་བོད་ཡིག་སློབ་ཁྲིད་གནང་། ཕྱི་ལོ་ ༡༩༦༣ ལོར་རྒྱ་གར་ལྷོ་ཕྱོགས་ལུགས་བསམ་བོད་མིའི་གཞིས་ཆགས་སུ་ཕེབས་ཏེ་བོད་ཀྱི་གཞོན་ནུ་རྣམས་ལ་ལོ་དྲུག་གི་རིང་ལས་ཞོར་སློབ་ཁྲིད་གནང་རྒྱུའི་ཐུགས་འགན་གཙོ་བོ་བཞེས། སྐབས་དེར་ཁོང་གིས་ལུགས་བསམ་བོད་མིའི་མཉམ་འབྲེལ་གྱི་འགན་འཛིན་ལྷན་ཚོགས་ཀྱི་ཚོགས་མི་དང་དྲུང་ཆེའི་ཕྱག་ལས་ཀྱང་གནང་། ཕྱི་ལོ་ ༡༩༦༩ ལོ་ནས་བཟུང་དུས་ཡུན་གསུམ་བསྟུན་མར་དབུས་གཙང་ཆོལ་ཁའི་ཐོབ་ཁོངས་ནས་བོད་མི་མང་སྤྱི་འཐུས་སུ་བདམས་ཐོན་བྱུང་ཞིང་གྲོས་ཚོགས་སྐབས་དྲུག་པའི་སྐབས་སུ་ཁོང་ཉིད་ཚོགས་གཞོན་དུ་བདམས་ཐོན་བྱུང་། ཕྱི་ལོ ༡༩༧༩ ལོར་ཁོང་ཉིད་བོད་དུ་གཟིགས་སྐོར་སྐུ་ཚབ་ཐེངས་དང་པོའི་སྐུ་ཚབ་ཚོགས་མིར་འདེམས་སྒྲུག་བྱུང་བས་བོད་དུ་ཕེབས། དེའི་རྗེས་སུ་ཁོང་གིས་བཀའ་བློན་དང་དྲུང་ཆེ། འདེམས་བསྐོ་ལྷན་ཁང་གི་འགན་འཛིན་སོགས་ལས་གནས་གལ་གནད་ཅན་འདྲ་མིན་ཐོག་ཐུགས་འགན་བཞེས་ཤིང་ཕྱི་ལོ་ ༡༩༩༢ ལོར་ཆེས་མཐོའོ་ཁྲིམས་ཞིབ་ཁང་བཙུགས་པ་ནས་བཟུང་ཕྱི་ལོ་ ༢༠༠༢ ལོར་བགྲེས་ཡོལ་དུ་མ་ཕེབས་བར་ཁྲིམས་ཞིབ་པ་ཆེ་བའི་ཐུགས་འགན་བཞེས་གནང་མཛད།

བསྟན་པ་ཚེ་རིང་།

ཚོགས་མི།

བསྟན་པ་ཚེ་རིང་ལགས་ཀྱིས་བོད་མིའི་སྒྲིག་འཛུགས་སུ་ལས་གནས་འདྲ་མིན་ཐོག་བགྲང་བྱ་བཞི་བཅུ་ལྷག་གི་རིང་ཕྱག་ལས་གནང་། ཕྱི་ལོ་ ༡༩༧༤ ནས་ ༡༩༨༠ བར་བོད་གཞུང་ཕྱི་དྲིལ་ལས་ཁུངས་ཀྱི་དྲུང་གཞོན་གྱི་ཐུགས་འགན་བཞེས། ཕྱི་ལོ་ ༡༩༨༡ ནས་ ༡༩༨༥ བར་དགའ་ལྡན་ཕོ་བྲང་གི་དྲུང་གཞོན་གྱི་ཐུགས་འགན་བཞེས། ཕྱི་ལོ་ ༡༩༨༨ ནས་༡༩༩༠ བར་བོད་གཞུང་ནང་སྲིད་ལས་ཁུངས་ཀྱི་དྲུང་འཕར་དང་ལྷོ་ཕྱོགས་བོད་མིའི་གཞིས་ཆགས་ལྔའི་ལྷོ་སྤྱི་བཅས་ཀྱི་ཐུགས་འགན་བཞེས། ཕྱི་ལོ་ ༡༩༩༡ ནས་༡༩༩༩ བར་ཕྱི་དྲིལ་ལས་ཁུངས་ཀྱི་དྲུང་ཆེའི་ཐུགས་འགན་བཞེས།

ཕྱི་ལོ་ ༢༠༠༠ ལོར་༧གོང་ས་མཆོག་གིས་བཀའ་བློན་གྱི་འོས་མིར་མཚན་འདོན་གནང་རྗེས་བཀའ་བློན་དུ་བདམས་ཐོན་བྱུང་། ཁོང་གིས་གྲོས་ཚོགས་སྐབས་བཅུ་གཅིག་པ་བར་དུ་ནང་སྲིད་ལས་ཁུངས་ཀྱི་བཀའ་བློན་གནང་། ཕྱི་ལོ་ ༢༠༠༦ ལོར་ཕྱི་དྲིལ་བཀའ་བློན་དང་ལྡི་ལི་སྐུ་ཚབ་དོན་གཅོད་བཅས་ཀྱི་ཐུགས་འགན་གཅིག་ལྕོག་ཏུ་བཞེས།

དབུ་དཀར་ཚང་གཡུ་སྒྲོན།

ཚོགས་མི། 

གཡུ་སྒྲོན་ལགས་ནི་ཨ་རིའི་ Tufts ཏཧྥཊི་གཙུག་ལག་སློབ་གྲྭ་ནས་རྒྱལ་སྤྱིའི་ཁྲིམས་དང་ཕྱི་འབྲེལ་རིག་པའི་ཐད་རབ་འབྱམས་པ་སློབ་ཐོན་གནང་། ལྡི་ལི་གཙུག་ལག་སློབ་གྲྭ་ལེ་ཌི་ཤཱི་རི་རམ་མཐོ་སློབ་ནས་ཉེ་བའི་གཙུག་ལག་རབ་འབྱམས་པ་ཐོན་རྗེས་ནེ་རུ་གཙུག་ལག་སློབ་གྲྭ་ནས་རྒྱལ་སྤྱིའི་ཆབ་སྲིད་རིག་པའི་ཐོག་རབ་འབྱམས་པའི་སློབ་སྦྱོང་ཐོན། ཕྱི་ལོ་ ༢༠༠༠ ལོ་ནས་བཟུང་ཁོ་མོས་འདི་ག་ལྟེ་གནས་ཁང་དུ་ལོ་བཞིའི་རིང་ལས་འཆར་དོ་དམ་པ་རྒན་པའི་ཕྱག་ལས་གནང་། ཁོ་མོས་བོད་ཀྱི་བུད་མེད་ལྷན་ཚོགས་ཀྱི་འགན་འཛིན་ལྷན་ཚོགས་ཀྱི་ཚོགས་མི་དང་ཕྱི་ལོ་ ༡༩༩༤ ལོ་ནས་ ༡༩༩༦ བར་བུད་མེད་ལྷན་ཚོགས་ཀྱི་ཉམས་ཞིབ་པའི་ཐུགས་འགན་བཞེས། མི་ལོ་ཉི་ཤུ་ལྷག་གི་རིང་ཁོང་གིས་བོད་མིའི་སྤྱི་ཚོགས་སུ་ལས་འགན་འདྲ་མིན་ཐོག་ཕྱག་ལས་གནང་། ཁོང་ཉིད་གྲོས་ཚོགས་སྐབས་བཅུ་བཞི་པ་དང་བཅོ་ལྔ་པ། བཅུ་དྲུག་པ། བཅུ་བདུན་པ་བཅས་སུ་བསྟུན་མར་མདོ་སྟོད་ཆོལ་ཁའི་ཐོབ་ཁོངས་ནས་བོད་མི་མང་སྤྱི་འཐུས་སུ་བདམས་ཐོན་བྱུང་། ཁོང་ནི་ན་གཞོན་ནུས་འཕེལ་ལས་གཞི (ENVISION)གསར་འཛུགས་གནང་མཁན་ཡིན་ཞིང་ཡུན་རིང་འགན་འཛིན་གྱི་ཕྱག་ལས་གནང་མཐར་ད་ལྟའི་ཆར་གྲོས་ཚོགས་སྐབས་བཅུ་བདུན་པའི་བོད་མི་མང་སྤྱི་འཐུས་དང་ན་གཞོན་ནུས་འཕེལ་ལས་གཞིའི་དགེ་རྩའི་དོ་དམ་པ་བཅས་ཀྱི་ཐུགས་འགན་བཞེས་མུས་ཡིན།

ཚེ་རིང་མཚོ་མོ།

འཛིན་སྐྱོང་དྲུང་ཆེ།

ཚེ་རིང་མཚོ་མོ་ལགས་ནི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་ལས་ཐོག་འགན་འཛིན་ཡིན། འདི་ག་ལྟེ་གནས་ཁང་དུ་མ་ཞུགས་པའི་གོང་དུ་ཁོང་གིས་བོད་ཀྱི་བུད་མེད་ལྷན་ཚོགས་ཀྱི་ཉམས་ཞིབ་དང་དྲིལ་བསྒྲགས་སྡེ་ཚན་དང་། ལྡི་ལི་སྐུ་ཚབ་དོན་གཅོད་ལས་ཁུངས། བོད་མིའི་སྒྲིག་འཛུགས་ཕྱི་དྲིལ་ལས་ཁུངས་བཅས་སུ་ཕྱག་ལས་གནང་བ་དང་ བོད་གནས་བསྐྱར་ཞིབ་Tibetan Review གསར་ཁང་གི་རྩོམ་སྒྲིག་པའི་ཐུགས་འགན་བཞེས་མྱོང་། ཁོ་མོ་ནི་མ་སུ་རི་བོད་ཁྱིམ་སློབ་གྲྭ་དང་ལྡི་ལི་གཙུག་ལག་སློབ་གྲྭ། ཨ་རིའི་ནིའུ་ཡོག་གཙུག་ལག་སློབ་གྲྭ་བཅས་ནས་སློབ་ཐོན་གནང་བ་དང་ཨེ་ཤི་ཡ་ཞི་བདེ་རྒྱ་མཚོའི་མངའ་ཁུལ་གྱི་ན་གཞོན་མཐུན་ཚོགས་འཛུགས་མཁན་གྱི་གྲས་ཡིན་པ་རེད། ཁོང་གིས་བཙན་བྱོལ་བོད་མི་སྤྱི་ཚོགས་དང་རྒྱལ་སྤྱིའི་ཁྲོད་དུ་ཆེད་རྩོམ་སྣ་མང་ཞིག་སྤེལ་མྱོང་ཡོད།

ལས་བྱེད།

ལྟེ་གནས་ཁང་གི་ཚོགས་མི་ཆ་ཚང་བཙན་བྱོལ་བོད་མི་ཤ་སྟག་ཡིན།

ཚེ་རིང་མཚོ་མོ།

འཛིན་སྐྱོང་འགན་འཛིན།

ཕུར་བུ་སྒྲོལ་མ།

རྩིས་པ་དང་ལས་ཁུངས་དོ་དམ་པ་གཅིག་ལྕོག

བསྟན་འཛིན་ཟླ་བ།

ལས་འཆར་དོ་དམ་པ་རྒན་པ།

སངས་རྒྱས་སྐྱབས།

རྒྱ་ཡིག་ཉམས་ཞིབ་པ།

བསྟན་འཛིན་བཟང་མོ། 

དྲིལ་བསྒྲགས་དང་ཉམས་ཞིབ་ལས་བྱེད།

ཉི་མ་འོད་ཟེར།

བོད་ཡིག་ཉམས་ཞིབ་པ།

བསྟན་འཛིན་ནོར་སྒྲིན།

ཁྲིམས་དོན་ལས་བྱེད།

སྐལ་བཟང་དགྲ་འདུལ།

བརྡ་འཕྲུལ་ལས་བྱེད།

བློ་བཟང་རྒྱལ་མཚན།

ཡིག་གད། 

Ila Schoop Rutten

ཞུ་གཏུག་དང་འབྲེལ་ལམ་སློབ་སྟོན་པ།
བོད་ཡིག