རྒྱ་གཞུང་གི་ས་གནས་ཉེན་རྟོག་པས་རྔ་བ་རྫོང་མཁར་གྱི་གཞུང་ལམ་སྟེང་དུ་བོད་རང་དབང་གི་ཞི་འབོད་གནང་མཁན་གྲྭ་གཞོན་སངས་རྒྱས་རྒྱ་མཚོ་འཛིན་བཟུང་བཙན་ཁྲིད་ཀྱིས་གར་ཁྱེར་ཅི་བྱས་ཆ་མེད་བཟོས་འདུག ཟླ་འདིའི་ཕྱི་ཚེས་༡༠ ཉིན་མདོ་སྨད་ཀིརྟི་དགོན་གྱི་དགེ་འདུན་པ་སངས་རྒྱས་རྒྱ་མཚོས་རྔ་བ་རྫོང་མཁར་གྱི་གཞུང་ལམ་སྟེང་དུ། བོད་ལ་རང་དབང་དགོས། ཞེས་ཞི་འབོད་གོམ་བགྲོད་གནང་སྐབས། དེ་མ་ཐག་རྒྱ་གཞུང་གི་ས་གནས་ཉེན་རྟོག་པ་སླེབས་ནས་ཁྲོམ་སྲང་མི་མང་གི་མཐོང་སར་དགེ་འདུན་པ་ཁོང་ལ་གཅར་རྡུང་གཏོང་བཞིན་འཛིན་བཟུང་བཙན་ཁྲིད་བྱས་ཡོད་ཀྱང་། ད་སྔར་རྒྱ་གཞུང་གིས་དགེ་འདུན་པ་ཁོང་གར་ཁྱེར་ཅི་བྱས་ཀྱི་གནས་སྟངས་གསལ་རྟོགས་མ་ཐུབ་པར་ལྷག་ཡོད། རང་ལོ་༡༧ ཡིན་པའི་དགེ་འདུན་པ་སངས་རྒྱས་རྒྱ་མཚོའི་ཕ་ཡུལ་སི་ཁྲོན་རྔ་བ་རྫོང་ཆོས་རྗེ་མ་ཡུལ་ཚོ་སོ་རུ་མ་སྡེ་བ་ནས་ཡིན་ཞིང་། ལོ་ན་ཆུང་དུས་ནས་ཁོང་ཀིརྟི་དགོན་གྱི་ཆོས་སྒོར་ཞུགས་ནས་ད་ལྟ་སྔོན་འགྲོའི་འཛིན་རིམ་དགུ་བ་ཡིན་འདུག ཁོང་གི་ཕ་མིང་ལ་རྗེས་དཀར་བཟོད་པ་དང་མ་མིང་ལ་དབང་ཁོ་ཟེར་ཞིང་། སྔོན་ཆད་ཁོང་ཚང་གི་འཚོ་ཐབས་གཙོ་བོ་འབྲོག་ལས་ཡིན་པ་དང་། ཕྱིས་སུ་ཀིརྟི་དགོན་མཐའི་གྲོང་དུ་གནས་སྤོར་བྱས་ཡོད་འདུག གཞན་ཡང་གོང་ཞུས་གནས་ཚུལ་དང་ཕྱོགས་མཚུངས། ཟླ་འདིའི་ཕྱི་ཚེས་༩ ཉིན་མདོ་སྨད་རྔ་བ་རྫོང་ཆོས་རྗེ་མ་ཡུལ་ཚོ་སོ་རུ་མ་སྡེ་བ་རང་ནས་ཡིན་པའི་གྲྭ་མིང་ལ་ཆོས་ཀྱི་རྒྱ་མཚོ་དང་སྐྱ་མིང་ལ་འབྲུག་ཁོ་ཞུ་བ་རང་ལོ་༢༢ ཡིན་པའི་གཞོན་སྐྱེས་ཤིག་གིས་རྔ་བ་རྫོང་ཐོག་ཏུ། ༧རྒྱལ་བ་བསྟན་འཛིན་རྒྱ་མཚོ་སྐུ་ཚེ་ཁྲི་ལོ་ནས་ཁྲི་ལོར་བརྟན་པར་ཤོག བོད་དོན་བདེན་མཐའ་སེལ་དགོས། ཞེས་རང་སྲེག་ཞི་འབོད་གནང་སྟེ་ཁོང་གི་གཟུགས་པོའི་བརྒྱ་ཆ་༧༠ འཚིག་སྐྱོན་བྱུང་བ་དང་། ཁོང་ད་ལྟ་སྐུ་གྲོངས་མེད་པའི་སྐོར་ཕྱིའི་གསར་འགྱུར་བརྒྱུད་ལམ་ཁག་ཏུ་སྤེལ་འདུག་ནའང་། སྔ་རྗེས་ཀྱི་གནས་ཚུལ་བྱུང་རིམ་དང་ལྷག་པར་དུ་ཁོང་དང་ཁོང་གི་ནང་མིའི་ད་ལྟའི་གནས་སྟངས་གསལ་རྟོགས་མ་ཐུབ་པས། འདི་ག་ལྟེ་གནས་ཁང་གི་ངོས་ནས་མུ་མཐུད་ཁོང་གི་དངོས་ཡོད་གནས་སྟངས་ཐད་ལ་ཞིབ་འཇུག་རྒྱུས་ལོན་བྱེད་མུས་ཡིན། རང་སྲེག་ཞི་འབོད་གནང་མཁན་འབྲུག་ཁོ་ནི་ཕྱི་ལོ་༢༠༠༩ ལོ་ནས་མདོ་སྨད་རྔ་བ་ཁུལ་དུ་རྒྱ་གཞུང་གིས་བོད་ཐོག་འཛིན་པའི་དབང་བསྒྱུར་དང་དྲག་གནོན་སྲིད་ཇུས་རབ་དང་རིམ་པར་རང་སྲེག་ཞི་རྒོལ་གནང་མཁན་གྲངས་༤༢ པ་དང་། བོད་ནང་དུ་རང་སྲེག་ཞི་འབོད་གནང་མཁན་གྲངས་༡༥༥ དེ་ཆགས་ཡོད།
<<རང་དབང་དང་འདྲ་མཉམ་ཆེད།>>ཅེས་པའི་དེབ་འདི་ནི་བོད་ཀྱི་རྩོམ་པ་པོ་ཞོགས་ལྗང་གི་རྩོམ་ཡིག་ཕྱོགས་བསྒྲིགས་ཀྱིས་ཨིན་བོད་སྐད་གཉིས་ཐོག་བཏོན་པ་ཞིག་ཡིན། དེབ་འདིའི་ནང་རྩོམ་པ་པོས་རྒྱ་ནག་གཞུང་གིས་བོད་ནང་འཛིན་པའི་སྲིད་ཇུས་དང་སྲིད་ཇུས་ལག་བསྟར་བྱེད་ཕྱོགས་ནོར་གྱི་ཡོད་ཚུལ་ལ་སྙིང་སྟོབས་ཆེན་པོ་སྐྱོན་བརྗོད་ཀྱི་རྩོམ་ཡིག་མང་པོ་སྤེལ་ཅིང་། སྨྲ་བརྗོད་རང་དབང་མེད་པའི་ཁོར་ཡུག་ཞིག་ནས་ཁོང་གིས་སྨྱུ་གུའི་སྟོགས་ཤུགས་ལ་བརྟེན་ནས་སྨྲ་བརྗོད་རང་དབང་རྩོད་ལེན་བྱས་ཏེ་བོད་ཀྱི་གནས་བབས་གླེང་ཡོད། འབྲུག་དཀར་རྒྱལ་ལམ་ཨ་དགའ་འབྲུག་ལོ་༼སྨྱུག་མིང་ལ་ཞོགས་ལྗང་།༽ ནི་ཕོ་ལོ་སུམ་ཅུར་སོན་པའི་མདོ་སྨད་བླ་བྲང་ས་ཁུལ་གྱི་རྩོམ་པ་པོ་ཞིག་ཡིན། ཁོང་ནི་སྙན་ངག་དང་། གཞས་ཚིག། སྒྲུང་ཐུང་བཅས་འབྲི་མཁན་ཞིག་ཡིན་པ་མ་ཟད། ལོ་ཙཱ་བ་དང་། དཔྱད་བརྗོད་རྩོམ་ཡིག་འབྲི་སྤེལ་མཁན་ཞིག་ཀྱང་ཡིན། ད་བར་ཁོང་གིས་ལམ་གྱི་སྙིང་སྟོབས་དང་། སྨྱུ་གུའི་སྟོབས། རང་དབང་གི་སླད་དུ་ང་ལ་བློ་འགྱོད་མེད། རང་གྲོལ་སྙིང་སྟོབས་སོགས་དེབ་བཞི་བྲིས་ཡོད། ཁོང་ནི་ནུབ་བྱང་མི་རིགས་སློབ་ཆེན་ནས་མཐར་ཕྱིན་ཅིང་། ལོ་ན་བཞི་ལ་སོན་པའི་བྱིས་པ་ཞིག་གི་ཨ་ཕ་ཡང་ཡིན་འདུག ཁོང་གིས་བསམ་བློ་དང་སྨྲ་བརྗོད་ཀྱི་རང་དབང་ལོངས་སུ་སྤྱད་སྟབས། ཁོང་ཕྱི་ལོ་༢༠༡༠ དང་༢༠༡༥ བཅས་སུ་རིམ་པར་ཐེངས་གཉིས་ལ་འཛིན་བཟུང་བྱས་ཤིང་། ཐེངས་སྔོན་མར་ཁོང་གིས་ས་བྱི་ཞི་རྒོལ་ཆེན་མོ་དང་འབྲེལ་བའི་རྩོམ་ཡིག་ཤར་དུང་རི་དུས་དེབ་སྟེང་སྤེལ་བར་བརྟེན་ཟླ་གཅིག་རིང་བཀག་ཉར་བྱས་ཡོད། དེ་རྗེས་ཁོང་འཛིན་བཟུང་བྱས་ནས་ལོ་གཅིག་ཙམ་གྱི་རྗེས་སུ་༼ ཕྱི་ལོ་ ༢༠༡༥ ཟླ་ ༣ ནས་འཛིན་བཟུང་བྱས་ཏེ་ཕྱི་ལོ་ ༢༠༡༦ ཟླ་ ༢ ༽ ལོ་གཙུམ་གྱི་བཙོན་འཇུག་ཁྲིམས་ཆད་བཅད་ཡོད། འོན་ཀྱང་ཁོང་གིས་རང་ཉིད་ལ་རྒྱ་ནག་གཞུང་གིས་ཁྲིམས་འགལ་གྱི་ཉེས་འགེལ་བྱས་པར་ངོས་ལེན་མེད་པའི་སྙན་ཞུ་ཤོག་ལྷེ་༡༢ ཅན་ཞིག་ཕུལ་ཏེ་རང་ཉིད་ཀྱི་སྨྲ་བརྗོད་རང་དབང་སྲུང་ཐབས་བྱས་ཡོད། འདི་ཡིས་ཕྱི་ལོ་༢༠༠༨ ལོ་ནས་རྒྱ་ནག་སྲིད་གཞུང་འོག་གི་བོད་ཀྱི་ཤེས་ཡོན་པ་དང་རྩོམ་པ་པོ་ཚོའི་བསམ་བློ་དང་སྨྲ་བརྗོད་ཀྱི་རང་དབང་ལ་ཚོད་འཛིན་ཤུགས་ཆེན་བྱས་དང་བྱེད་མུས་ཡིན་པ་གསལ་བོར་མཚོན་གྱི་ཡོད། འབྲེལ་ཐག་འདི་བརྒྱུད་ནས་དེབ་ཆ་ཚང་ཀློག་ཐུབ།
ཕྱི་ལོ་ ༢༠༡༣ ནི་རྒྱ་དམར་མགོ་ཁྲིད་གསར་རྙིང་བརྗེ་བོ་བརྒྱབ་རྗེས་ཀྱི་ལོ་དང་པོ་དེ་ཆགས་ཡོད་སྟབས། ཞི་ཅིན་ཕིན་གྱིས་མགོ་ཁྲིད་པའི་རྒྱ་དམར་མགོ་ཁྲིད་གསར་པའི་དུས་ཡུན་རིང་། རྒྱ་གཞུང་གིས་བོད་ཐོག་འཛིན་པའི་མི་སེར་སྤེལ་བའི་དྲག་གནོན་དབང་སྒྱུར་གྱི་སྲིད་ཇུས་གཙོས་བོད་ནང་གི་འགྲོ་བ་མིའི་ཐོབ་ཐང་གནས་སྟངས་ཐད། འགྱུར་བ་ག་འདྲ་ཞིག་ཐེབས་མིན་ཐད་ཚོད་བགམ་དོགས་སློང་སྣ་ཚོགས་ཤིག་བྱེད་བཞིན་ཡོད་པ་རེད། ཡིན་ནའང་། འདས་པའི་ལོ་གཅིག་རིང་བོད་ནང་གི་གནས་སྟངས་ལ་བཟང་ཕྱོགས་ཀྱི་འགྱུར་བ་གང་ཡང་ཕྱིན་མེད་པ་མ་ཟད། དེ་ལས་ལྡོག་སྟེ་བོད་ནང་དམག་མི་དང་ལས་དོན་རུ་ཁག་འབོར་ཆེན་འགྲེམས་འཇོག་ཐོག རྒྱལ་གཅེས་ཆོས་གཅེས་དང་དམར་ཤོག་མང་ཚོགས་ལམ་ཕྱོགས་སློབ་གསོ་ཟེར་བ་སོགས་དྲིལ་བསྒྲགས་སྲིད་ཇུས་སྤེལ་ཤུགས་ཆེ་རུ་བཏང་ཡོད་སྟབས། འདི་ལོ་གཅིག་པུར་བོད་ནང་དུ་རང་ལུས་མེར་བསྲེགས་ཀྱིས་རྒྱ་གཞུང་ལ་ངོ་རྒོལ་གནང་མཁན་ ༢༧ བྱུང་ཡོད་པ་དང་། བོད་མི་བརྒྱ་ཕྲག་མང་པོ་རྒྱ་གཞུང་གི་འཇུ་བཟུང་བཀག་ཉར་དང་བཙོན་འཇུག་མནར་གཅོད་འོག་ཚུད་ཡོད། དེ་བཞིན། རྒྱ་གཞུང་གི་དྲག་གནོན་སྲིད་ཇུས་འོག་བསྡོད་བཟོད་མ་ཐུབ་པར་རྒྱ་གར་ནང་བཙན་བྱོལ་དུ་འབྱོར་མཁན་ ༡༥༧ བཅས་བྱུང་ཡོད་པ་རེད།
རྒྱ་གཞུང་གིས་གསང་བའི་ཐོག་བོད་མི་མང་པོ་འཇུ་བཟུང་བཙན་ཁྲིད་གར་སོང་ཆ་མེད་དུ་འགྱུར་བཞིན་ཡོད་པ་ལྟར། ཟླ་འདིའི་ཕྱི་ཚེས་ ༡༡ ཉིན་གྱི་མཚན་མོར། རང་ལོ་ ༢༧ ཡིན་པའི་བོད་མི་ཐུབ་བསྟན་རྒྱལ་མཚན་ཟེར་བ་ཞིག་རྒྱ་གཞུང་ཉེན་རྟོག་པས་བཙན་འཁྲིད་ཀྱིས་གར་སོང་ཆ་མེད་དུ་གྱུར་འདུག
འདི་ག་ལྟེ་གནས་ཁང་ལ་གནས་ཚུལ་འབྱོར་དོན། རྒྱ་གཞུང་གིས་བོད་ས་བཅད་བགོས་ཀྱི་ད་ལྟའི་ས་ཁོངས་ལྟར་བྱས་ན། བོད་རང་སྐྱོང་ལྗོངས་ནག་ཆུ་ས་ཁུལ་སོག་རྫོང་རྒྱལ་ཆེན་ཤང་གྲོང་ཚོ་ལྔ་པ་ནས་ཡིན་ཞིང་། ད་ལྟ་རང་ལོ་ ༢༧ ཡིན་པའི་བོད་མི་ཐུབ་བསྟན་རྒྱལ་མཚན་ནམ་ཐུབ་རྒྱལ་ཟེར་བའི་བོད་མི་ཞིག ཕྱི་ལོ་ ༢༠༡༣ ཟླ་ ༡༡ ཚེས་ ༡༡ ཉིན་སྟེ་གཟའ་ཉི་མའི་མཚོན་མོར་རྒྱ་གཞུང་ཉེན་རྟོག་པས་གསང་བའི་ཐོག་འཇུ་བཟུང་གིས་གར་སོང་ཆ་མེད་དུ་གྱུར་ཡོད་འདུག
དུར་ས་འཚོལ་བའི་མི་ཞེས་པའི་དེབ་འདི་ནི་བོད་ནང་གནས་བཞུགས་རྩོམ་པ་པོ་སྨར་ལྗང་སྨྱུག་ལགས་ཀྱིས་བརྩམས་ཤིང་། དེབ་འདིའི་ནང་བོད་ནང་མི་རབས་རྒན་པ་རྣམས་ལ་བཅར་འདྲིའི་ལམ་ནས་རྒྱ་གཞུང་གིས་བོད་ལ་ཐོག་མར་བཙན་འཛུལ་སྐབས་ཀྱི་ལོ་རྒྱུས་དང་། ད་ལྟའི་བོད་ནང་གི་ཛ་དྲག་གནས་སྟངས། རྩོམ་པ་པོ་རང་ཉིད་ཀྱི་སེམས་ཚོར་མཚོན་པའི་སྙན་ངག་བཅས་འཁོད་ཡོད། དེབ་ཧྲིལ་བོར་གཤམ་གྱི་དྲ་ཐག་བརྒྱུད་གཟིགས་ཐུབ། http://www.scribd.com/doc/154289811/Nyapa-Tibetan-Book