ཁམས་རྟའུ་རྫོང་དུ་བཙུན་མ་དབང་ཆེན་སྒྲོལ་མས་རང་ལུས་མེར་བསྲེགས་ཀྱིས་སྐུ་གྲོངས་འདུག

ཟླ་འདིའི་ཕྱི་ཚེས་ ༡༡ ཉིན་ཁམས་རྟའུ་རྫོང་ཐོག་ནས་བཙུན་མ་དབང་ཆེན་སྒྲོལ་མས་རང་ལུས་མེར་བསྲེགས་ཀྱིས་རྒྱ་གཞུང་གི་དྲག་གནོན་དབང་སྒྱུར་གྱི་མི་སེར་སྤེལ་བའི་སྲིད་ཇུས་ལ་ངོ་རྒོལ་གནང་སྟེ།  ཕྱི་ཚེས་ ༡༤ ཉིན་གྱི་ཕྱི་དྲོ་དར་རྩེ་མདོའི་སྨན་ཁང་ཞིག་ཏུ་སྐུ་གྲོངས་ཡོད་པ་དང་།  རྒྱ་གཞུང་གིས་ཁོང་མོའི་སྐུ་ཕུང་ནང་མིར་རྩིས་སྤྲོད་མ་བྱས་པར་མེར་བསྲེགས་བྱས་ཡོད་འདུག  བཙུན་མ་དབང་ཆེན་སྒྲོལ་མ་ནི་ཁམས་རྟའུ་རྫོང་དུ་རྒྱ་ནག་སྲིད་གཞུང་གི་སྲིད་ཇུས་ལ་ངོ་རྒོལ་གྱིས་རང་ལུས་མེར་སྲེག་གནང་མཁན་གསུམ་པ་དང་།  བོད་ནང་རང་ལུས་མེར་བསྲེགས་གནང་མཁན་  ༡༡༩ པ་དེ་ཆགས་ཡོད།  ཡིན་ནའང་། རྒྱ་གཞུང་གིས་བོད་ནང་གི་དངོས་ཡོད་དཀའ་སྡུག་གནས་སྟངས་ལ་ཉན་འཇོག་མ་བྱས་པར་བོད་ནང་མུ་མཐུད་དྲག་གནོན་དམ་དྲག་གི་བྱ་སྤྱོད་ཁོ་ན་ལག་བསྟར་བྱེད་བཞིན་ཡོད།