03/08/2020

ལོ་སྔོན་མར་འཇུ་བཟུང་ཟིན་པའི་སློབ་ཕྲུག་རྡོ་རྗེ་ལ་ཁྲིམས་ཐག་དང་གྲྭ་བ་གཉིས་ཕྱིར་ཀློད་འདུག

  •   
  •  
  •  
  •  
  •  
  •  
  •  
Dorjee in Rebkong
ལོ་གཉིས་དང་ཕྱེད་ཀའི་བཙོན་འཇུག་ཁྲིམས་ཐག་བཅད་ཡོད་པའི་སློབ་ཕྲུག་རྡོ་རྗེ།

ལོ་སྔོན་མར་བོད་མདོ་སྨད་རེབ་གོང་ཁུལ་དུ་རྒྱ་གཞུང་གི་དྲག་གནོན་དབང་སྒྱུར་གྱི་མི་སེར་སྤེལ་བའི་སྲིད་ཇུས་ལ་ངོ་རྒོལ་གྱིས་རང་ལུས་མེར་བསྲེགས་ཀྱི་གནས་ཚུལ་རིམ་པར་བྱུང་རྗེས། རྒྱ་གཞུང་གིས་སློབ་ཕྲུག་དང་ས་གནས་སྐྱ་སེར་བོད་མི་མང་པོ་འཇུ་བཟུང་བྱས་ཏེ། རྒྱལ་ཁབ་ཁ་བྲལ་གྱི་ནག་ཉེས་འདྲ་མིན་བཙུགས་ཏེ་ཁྲིམས་གཅོད་བཙོན་འཇུག་བྱེད་བཞིན་པ་ལྟར། རེབ་གོང་ས་གནས་སློབ་འབྲིང་གི་སློབ་ཕྲུག་རྡོ་རྗེ་ལ་ལོ་གཉིས་དང་ཕྱེད་ཀའི་དུས་བཀག་བཙོན་འཇུག་གི་ཁྲིམས་ཐག་བཅད་ཡོད་པ་དང་། དེ་སྔོན་འཇུ་བཟུང་བཀག་ཉར་འོག་ཡོད་པའི་གྲྭ་གྲགས་པ་རྒྱ་མཚོ་དང་འཇིགས་མེད་བསྟན་འཛིན་གཉིས་ཕྱིར་ཀློད་འདུག

འདི་ག་ལྟེ་གནས་ཁང་ལ་གནས་ཚུལ་འབྱོར་དོན། ལོ་ ༢༠༡༢ ཟླ་ ༡༡ ནང་བོད་མདོ་སྨད་རེབ་གོང་དུ་བསྟུད་མར་རྒྱ་གཞུང་གི་དྲག་གནོན་དབང་བསྒྱུར་གྱི་མི་སེར་སྤེལ་བའི་སྲིད་ཇུས་ལ་ངོ་རྒོལ་གྱི་རང་ལུས་མེར་སྲེག་རིམ་པར་བྱུང་བའི་རྗེས། རྒྱ་གཞུང་གིས་རེབ་གོང་ས་ཁུལ་གྱི་ས་གནས་སྐྱ་སེར་མང་པོ་གང་བྱུང་འཇུ་བཟུང་བཙོན་འཇུག་བྱས་ཡོད་པ་ལྟར། སྐབས་དེ་དུས་འཇུ་བཟུང་བཙན་ཁྲིད་བྱས་ཡོད་པའི་སློབ་མ་རྡོ་རྗེ་ཟེར་བ་ཞིག་ལ། རང་ལུས་མེར་བསྲེགས་ཀྱི་ངོ་རྒོལ་ལ་འབྲེལ་བ་ཡོད་པ་དང་རང་བཙན་སྐད་འབོད་བྱས་པ། ༼གངས་སྲོལ་རྒྱུན་འཛིན་ཚོགས་པ༽་ཞེས་པ་བཙུགས་པའི་ཉེས་མིང་འོག ཕྱི་ལོ་ ༢༠༡༣ ཟླ་ ༢ པའི་ཟླ་མགོ་ཙམ་ཞིག་ལ་ལོ་ ༢ དང་ཕྱེད་ཀའི་བཙོན་འཇུག་ཁྲིམས་ཐག་བཅད་ཡོད་པ་དང་། ཁོང་ད་ལྟ་ཟི་ལིང་གི་བཙོན་ཁང་ཞིག་ཏུ་བཙོན་འཇུག་ཡོད་འདུག
སློབ་ཕྲུག་རྡོ་རྗེ་ནི་རེབ་གོང་ཁུལ་ཐོག་གི་སློབ་འབྲིང་གི་སློབ་མ་ཞིག་ཡིན་པ་དང་། ད་ལྟའི་རྒྱ་གཞུང་གི་བོད་ས་བཅད་བགོས་ཀྱི་ས་ཁོངས་ལྟར་བྱས་ན། མཚོ་སྔོན་ཞིང་ཆེན་རྨ་ལྷོ་ཁུལ་ཐུན་རིན་རྫོང་མདོ་བ་ཞང་ཁྱུ་ལྔ་སྡེ་བའི་ཡིན་པ་རེད། རྒྱ་གཞུང་གིས་ཆབ་སྲིད་ཐོག་བོད་ལ་བཙན་གྱིས་དབང་སྒྱུར་དང་། བོད་ཀྱི་སྐད་ཡིག་རིག་གནས་ལ་བཀག་སྡོམ་བྱས་པར་བརྟེན་ནས། རྨ་ལྷོ་དང་མཚོ་ལྷོ་ཁུལ་གཉིས་གཙོས་སློབ་གྲྭ་ཁག་གི་སློབ་ཕྲུག་སྟོང་ཕྲག་མང་པོས་སྔ་ཕྱིར་ངོ་རྒོལ་སྐད་འབོད་ཀྱི་གནས་སྟངས་བྱུང་ཡོད་ལ། རྒྱ་གཞུང་གིས་སློབ་ཕྲུག་མང་པོ་འཇུ་བཟུང་བཙན་ཁྲིད་ཀྱིས་ཉེས་མིང་འདྲ་མིན་འོག་ཁྲིམས་ཐག་བཅད་ཡོད་པ་རེད།

གཞན་ཡང་། ལོ་སྔོན་མར་རང་ལུས་མེར་བསྲེགས་དང་འབྲེལ་ཏེ་འཛིན་བཟུང་བྱས་པའི་ཁྲོད་ནས། རེབ་གོང་མདོ་བ་མཁར་སྐྱ་སྡེ་བའི་གྲྭ་བ་གྲགས་པ་རྒྱ་མཚོ་ལགས་དང་། མདོ་བ་རྒྱ་འདུ་སྡེ་བའི་གྲྭ་བ་འཇིགས་མེད་བསྟན་འཛིན་གཉིས་ལ་རང་ལུས་མེར་སྲེག་གནང་མཁན་དང་འབྲེལ་འདྲིས་ཡོད་སྐོར་དང་། བོད་རང་བཙན་སྐད་འབོད་ཀྱི་ཉེས་མིང་འོག་འཇུ་བཟུང་བྱས་ཏེ། རེབ་གོང་ཁུལ་དང་ཟི་ལིང་གྲོང་ཁྱེར་བཅས་ཀྱི་བཀག་བསྐྱིལ་ཁང་སོགས་སུ་འཁྲིད་ནས། ཟླ་ ༩ ལྷག་གི་རིང་ལ་བཀག་ཉར་གཅར་རྡུང་དང་འདྲི་གཅོད་བྱས་མཐར། ཕྱི་ལོ་ ༢༠༡༣ ཟླ་ ༨ ཚེས་མགོ་ཙམ་ལ་ཕྱིར་ཀློད་ཡོད་འདུག

ལོ་སྔོན་མར་རེབ་གོང་ཁུལ་དུ་རང་ལུས་མེར་བསྲེགས་ཀྱིས་རྒྱ་གཞུང་གི་དྲག་གནོན་དབང་སྒྱུར་གྱི་མི་སེར་སྤེལ་བའི་སྲིད་ཇུས་ལ་ངོ་རྒོལ་རིམ་པར་བྱུང་རྗེས། མཚོ་སྔོན་ཞིང་ཆེན་ཉེན་རྟོག་ཁང་གིས་རྨ་ལྷོ་ཁུལ་དུ་ཞིང་ཆེན་རིམ་པའི་མེར་སྲེག་གྱོད་དོན་ཚོགས་ཆུང་ཞིག་ཆེད་འཛུགས་བྱས་ཡོད་པ་དང་། ཚོགས་ཆུང་དེའི་མགོ་གཙོའི་འགན་ནི་མཚོ་སྔོན་ཞིང་ཆེན་ཉེན་རྟོག་ཁང་གི་མགོ་གཙོ་གཞོན་པ་ལུའུ་པིན་ཆཱན་གྱིས་ཁུར་ཡོད།

ཕྱི་ལོ་ ༢༠༡༣ ཟླ་ ༢ པའི་ཚེས་ ༧ ཉིན་རྒྱ་གཞུང་ཞིན་ཧྭ་གསར་ཁང་གིས་གནས་ཚུལ་སྤེལ་བའི་ནང་། མཚོ་སྔོན་གྱི་ཉེན་རྟོག་སྡེ་ཁག་གིས་བོད་མདོ་སྨད་རེབ་གོང་ཁུལ་གྱི་མེར་བསྲེགས་ངོ་རྒོལ་ལ་བརྒྱུད་སྐུལ་བྱས་པའི་ཉེས་མིང་འོག བོད་མི་ ༧༠ འཇུ་བཟུང་བཀག་ཉར་བྱས་ཡོད་པ་དང་། དེའི་ཁྲོད་མི་ ༥༢ ལ་དྲག་སྡོམ་འདྲི་གཅོད་དངོས་སུ་ལག་བསྟར་དང་། མི་ ༡༢ དངོས་སུ་འཛིན་བཟུང་ཁྲིམས་གཅོད་བྱ་གཏན་ཁེལ་ཡོད་སྐོར་བསྒྲགས་ཡོད་པ་རེད།