16/12/2019

རྩོམ་པ་པོ་ཞོགས་དྲིལ་དང་ཉེན་རྟོག་ཟུར་པ་གཡུལ་གཉིས་ལ་ཁྲིམས་ཐག་ལྕི་མོ་བཅད་འདུག

  •   
  •  
  •  
  •  
  •  
  •  
  •  

རྒྱ་གཞུང་གིས་ཁྲིམས་མཐུན་འགྲོ་ལུགས་གང་ཡང་མ་བརྒྱུད་པར་གསང་བའི་ཐོག   ན་གཞོན་རྩོམ་པ་པོ་ཚུལ་ཁྲིམས་རྒྱལ་མཚན་ལགས་ལ་ལོ་ ༡༣ དང་། ཉེན་རྟོག་པ་ཟུར་བ་གཡུལ་རྒྱལ་ལགས་ལ་ལོ་ ༡༠ བཅས་ཀྱི་དུས་བཀག་བཙོན་འཇུག་གི་ཁྲིམས་ཐག་བཅད་འདུག  ཁོང་གཉིས་ལ་ཁྲིམས་བཅད་ནས་ཟླ་བཞི་ལྷག་ཕྱིན་ཡོད་ནང་། རྒྱ་གཞུང་གིས་ཉེ་ཆར་མ་གཏོགས་ནང་མིར་ཁོང་གཉིས་གར་ཡོད་གྱི་གནས་སྟངས་ཤེས་རྟོགས་དང་། ཁོང་གཉིས་ལ་ཐུག་འཕྲད་སོགས་ཅི་ཡང་བྱེད་བཅུག་མེད་པར་ཡུན་རིང་གར་སོང་ཆ་མེད་ཀྱི་གནས་སྟངས་འོག་ལྷག་དགོས་བྱུང་ཡོད་འདུག

 

ལོ་བཅུ་གསུམ་གྱི་བཙོན་འཇུག་ཁྲིམས་ཐག་བཅད་ཟིན་པའི་གཞོན་སྐྱེས་རྩོམ་པ་པོ་ཚུལ་ཁྲིམས་རྒྱལ་མཚན་ནམ་ཞོགས་དྲིལ་ལགས།
ལོ་བཅུ་གསུམ་གྱི་བཙོན་འཇུག་ཁྲིམས་ཐག་བཅད་ཟིན་པའི་གཞོན་སྐྱེས་རྩོམ་པ་པོ་ཚུལ་ཁྲིམས་རྒྱལ་མཚན་ནམ་ཞོགས་དྲིལ་ལགས།

འདི་ག་ལྟེ་གནས་ཁང་ལ་གནས་ཚུལ་འབྱོར་དོན།  ཕྱི་ལོ་ ༢༠༡༣ ཟླ་ ༡༠ ཚེས་ ༢༨ ཉིན། བོད་རང་སྐྱོང་ལྗོངས་མི་དམངས་ཁྲིམས་ཁང་ནས། ཁམས་ནགས་ཤོད་འབྲི་རུ་རྫོང་གི་ན་གཞོན་རྩོམ་པ་པོ་ཚུལ་ཁྲིམས་རྒྱལ་མཚན་ལགས་ལ་ལོ་ ༡༣ དང་། གཡུལ་རྒྱལ་ལགས་ལ་ལོ་ ༡༠ བཅས་ཀྱི་དུས་བཀག་བཙོན་འཇུག་གི་ཁྲིམས་ཐག་བཅད་འདུག

 

༢༠༡༣ ལོའི་ཟླ ༩ པའི་ཚེས ༢༧ ཉིན། ཁམས་འབྲི་རུ་རྫོང་འབྲི་རུ་ཤང་མོ་བ་གྲོང་དང་སྨོན་ཁྱིམ་གྲོང་གཙོས་པའི་ས་གནས་ཡུལ་མི་རྣམས་ཀྱིས། རྒྱ་གཞུང་གི་རྒྱལ་དར་སོ་སོའི་ཁང་སྟེང་དུ་སྒྲེང་འཛུགས་མ་བྱས་པར། རྒྱལ་མོ་རྔུལ་ཆུར་གཡུགས་པའི་གནས་ཚུལ་ལྷག་པ་ནས་བཟུང་།   རིམ་བཞིན་ཟླ་དེའི་ཚེས ༢༨ ཉིན་འབྲི་རུ་རྫོང་མི་དམངས་སྲིད་གཞུང་མདུན་དུ་བོད་མི་སྟོང་ཕྲག་ལྷག་འཛོམས་ནས། ཟས་བཅད་ངོ་རྒོལ་དང་སྦྲགས་ཏེ་མཚན་ཉལ་བྱས་པ་མ་ཟད།  མོ་བ་གྲོང་དང་སྨོན་ཁྱིམ་གྲོང་སོགས་ནས་ཉེས་མེད་འཛིན་བཟུང་བྱས་པའི་ས་གནས་ཡུལ་མི་རྣམས་ཀྱི་རྒྱབ་ལངས་བྱས་ཡོད། དེ་ཙམ་དུ་མ་ཟད།  ཁོང་ཚོས་འཛིན་བཟུང་བྱས་པ་དེ་དག་འཕྲལ་དུ་གློད་བཀྲོལ་གཏོང་དགོས་པའི་རེ་འདུན་ཤུགས་ཆེ་བཏོན།  ཉིན་མོ་དེར་འབྲི་རུ་རྫོང་གི་སློབ་གྲྭ་ཆུང་འབྲིང་སོགས་ཀྱིས་ངོ་རྒོལ་བྱས་ནས་ཉིན་ལྔ་དྲུག་རིང་ལ་སློབ་གྲྭ་སྟོང་པ་ཆགས་པ་སོགས། ས་གནས་རྫོང་ཁུལ་དུ་གནས་ཚུལ་ཛ་དྲག་ཆགས་ཡོད་པ་རེད།

 

དེར་བརྟེན། བོད་རང་སྐྱོང་གི་དམར་ཤོག་མགོ་ཁྲིད་ཝུ་ཡེང་ཅེ་དང་རྡོ་ཐོག་སོགས་འབྲི་རུ་རྫོང་དུ་སླེབས་ནས།  འཇམ་རྩུབ་ཅི་རིགས་ཀྱི་སྒོ་ནས་མང་ཚོགས་རང་བཞིན་གྱི་ཞི་བའི་ངོ་རྒོལ་འཇགས་ཐབས་བྱས་པ་མ་ཟད།  རྒྱ་དམར་མགོ་ཁྲིད་ཝུན་ཡེང་ཅེ་སོགས་ནས་མཚན་མོ་ཐང་ནས་ཉལ་ཏེ་ཞི་བའི་ངོ་རྒོལ་བྱེད་མཁན་མི་མང་ཡོད་སར་ཡོང་ནས་ངོ་རྒོལ་མཚམས་འཇོག་དགོས་པའི་གཏམ་བཤད་བྱས་ཡོད་པ་དང་།  སྐབས་དེར་རྩོམ་པ་པོ་ཞོགས་དྲིལ་དང་ཁོང་གི་གྲོགས་པོ་གཡུལ་རྒྱལ་སོགས་ཀྱིས་མི་དམངས་ཀྱི་དཀྱིལ་ནས་མདུན་དུ་ཐོན་ཏེ།  མི་དམངས་ཀྱི་བདེ་སྡུག་མཚོན་པའི་སྐད་ཆ་མང་པོ་ཐད་ཀར་བརྗོད་ཡོད་པ་རེད།

 

དེ་རྗེས་ཕྱི་ཟླ་བ ༡༠  པའི་ཚེས ༡༡ ཉིན་མཚན་མོའི་ཆུ་ཚོད ༡ ཙམ་ལ། འབྲི་རུ་རྫོང་ཉེན་རྟོག་མི་སྣ་ཁ་ཤས་གློ་བུར་དུ་འབྲི་རུ་རྫོང་གཤམ་ཆུ་ཤང་སྟེང་མཁར་གྲོང་དུ་འབྱོར་ཏེ། ཞོགས་དྲིལ་གྱི་སྡོད་ཁྱིམ་དུ་འཛུལ་ནས་ཁོང་འཛིན་བཟུང་བྱས་པ་དང་།   དེའི་ཕྱི་ཉིན་སྔ་དྲོ་ཁོང་གི་གྲོགས་པོ་གཡུལ་རྒྱལ་ཡང་འབྲི་རུ་རྫོང་གཤམ་ཆུ་ཤང་སྟེང་མཁར་གྲོང་ནས་འཛིན་བཟུང་བྱས་རྗེས།  ཉེ་ཆར་ཕྱི་ལོ་ ༢༠༡༤ ཟླ་ ༣ པའི་ཟླ་སྨད་བར་ལ་གནས་ཚུལ་གང་ཡང་ཤེས་རྟོགས་མེད་པར་གར་སོང་ཆ་མེད་གྱུར་ཡོད་ཀྱང་། གཟའ་འཁོར་སྔོན་མའི་ནང་རྒྱ་གཞུང་གིས་ཁོང་གཉིས་ཀྱི་ནང་མི་རེ་རེ་ཁོང་གཉིས་ལ་ཐུག་ཆོག་པའི་བཀའ་འཁྲོལ་སྤྲད་པར་བརྟེན་ནས། ད་གཟོད་ཁོང་གཉིས་ལྷ་ས་ཆུ་ཤུར་བཙོན་ཁང་དུ་བཙོན་འཇུག་བྱས་ཡོད་པ་གཞི་ནས་ཤེས་ཡོད་པ་དང་། བཙོན་ཁང་ནང་ཁོང་གཉིས་དང་ནང་མིའི་བར་ཕན་ཚུན་ཁ་པར་བརྒྱུད་སྐར་མ་བཅུ་རེ་ཙམ་སྐད་ཆ་བཤད་བཅུག་ཡོད་འདུག

 

སྐབས་དེར་ནང་མི་ཚོས་གཞི་ནས་རྩོམ་པ་པོ་ཞོགས་དྲིལ་ལ་མི་ལོ་ ༡༣ དང་། གཡུལ་རྒྱལ་ལ་མི་ལོ་ ༡༠ དུས་བཀག་བཙོན་འཇུག་གི་ཁྲིམས་ཐག་བཅད་ཡོད་པ་གཞི་ནས་ཤེས་རྟོགས་བྱུང་ཡོད་པ་རེད། རྒྱ་གཞུང་གིས་ཁོང་གཉིས་ལ་ཁྲིམས་ལུགས་དང་འགལ་བའི་སྒོ་ནས་སྲིད་གཞུང་མགོ་ཁྲིད་ལ་སྐད་ཆ་འདྲ་མི་འདྲ་བཤད་པ་དང་།  སྤྱི་ཚོགས་ཟིང་ཆ་བསླངས་པ་སོགས་ཀྱི་ཉེས་པ་བཙུགས་ནས་བོད་རང་སྐྱོང་མི་དམངས་ཁྲིམས་ཁང་གིས་ཁྲིམས་ཐག་བཅད་ཡོད་འདུག  ཡིན་ནའང་། ཁོང་གཉིས་ལ་ཁྲིམས་གཅོད་ཀྱི་བརྒྱུད་རིམ་ཁྲོད་ཁྲིམས་རྭ་འཚོགས་མེད་ལ།  ཁྱིམ་མིར་ཁྲིམས་ཁང་གང་ཞིག་ནས་ཁྲིམས་བཅད་བྱས་པ་སོགས་ཀྱི་ཡིག་ཆ་གང་སྤྲད་མེད་པར་གསང་བའི་ཐོག་ནས་ཁྲིམས་ཐག་བཅད་ཡོད་འདུག

 

ཞོགས་དྲིལ་དང་ཁོང་གི་གྲོགས་པོ་གཡུལ་རྒྱལ་གཉིས་དེ་ལྟར་བཙོན་འཇུག་དང་ཁྲིམས་གཅོད་བཏང་བ་གོ་རྗེས། བོམ་ཕན་ཤང་གྲོང་སྟེང་མཁར་གྲོང་།  རི་ཞིང་གྲོང་སོགས་གྲོང་ཚོ་ཕལ་ཆེ་བ་ནས་གཅིག་སྒྲིལ་ངང་ས་གནས་རྒྱ་ནག་སྲིད་གཞུང་ལ་མྱུར་དུ་གློད་བཀྲོལ་གཏོང་དགོས་པའི་སྙན་ཞུ་ཕུལ་ནས་ཞུ་བ་མང་པོ་བརྒྱབས་མོད་ཉན་འཇོག་རྩ་བ་ནས་མེད་པར་ཉེས་མེད་ཉེས་འཛུགས་བྱས་ནས་ཁྲིམས་གཅོད་བཏང་ཡོད་ལ།  ཐ་ན་ཡར་ཞུ་བྱེད་མཁན་མི་ཉུང་བ་ཞིག་ཀྱང་སྔ་རྗེས་འཛིན་བཟུང་བཀག་ཉར་དང་དངུལ་ཆད་བཅད་པ་རེད།

 

ད་ལྟའི་ཆར་བོད་རང་སྐྱོང་ལྗོངས་ཀྱི་མངའ་ཁོངས་སུ། བོད་མི་མང་པོ་ཞིག་ལ་ཆབ་སྲིད་གནས་ཚུལ་དང་འབྲེལ་བ་ཡོད་ཚེ་ཁྲིམས་རྭ་གང་ཡང་འཚོགས་མི་དགོས་ལ།  ཁྱིམ་བདག་ལ་ཁྲིམས་ཆད་ཡིག་ཆ་སོགས་འགྲོ་ལུགས་ཅི་གང་མི་དགོས་པར། གང་བྱུང་ལོ་གྲངས་མང་པོའི་ཁྲིམས་གཅོད་བྱེད་བཞིན་ཡོད་འདུག ༢༠༡༣ ལོའི་ལོ་སྨད་ནས་ཁམས་ནགས་ཤོད་འབྲི་རུ་རྫོང་དུ་བོད་མི་མང་པོ་ཞིག་དེ་ལྟར་འཛིན་བཟུང་ཁྲིམས་གཅོད་བྱས་ཡོད་པ་རེད།

 

ལོ་བཅུའི་བཙོན་འཇུག་ཁྲིམས་ཐག་བཅད་ཟིན་པའི་ཉེན་རྟོག་ལས་བྱེད་ཟུར་པ་གཡུལ་རྒྱལ་ལགས།
ལོ་བཅུའི་བཙོན་འཇུག་ཁྲིམས་ཐག་བཅད་ཟིན་པའི་ཉེན་རྟོག་ལས་བྱེད་ཟུར་པ་གཡུལ་རྒྱལ་ལགས།

གཞོན་སྐྱེས་རྩོམ་པ་པོ་ཚུལ་ཁྲིམས་རྒྱལ་མཚན་ནམ། སྨྱུག་མིང་ལ་ཞོགས་དྲིལ་ལགས་ནི་ཕ་ཡུལ་ཁམས་ནགས་ཤོད་འབྲི་རུ་རྫོང་གཤམ་ཆུ་ཤང་སྟེང་མཁར་གྲོང་ནས་ཡིན་ལ། ཆུང་དུས་ནས་གཤམ་ཆུ་ཤང་སློབ་ཆུང་འགྲིམས་པ་དང་། ༢༠༠༡ ལོར་སྡེ་དགེ་དཔལ་ཡུལ་བཤད་གྲར་ཞུགས་ཏེ། ནང་ཆོས་གཙོས་པའི་བོད་ཀྱི་ཐུན་མོང་དང་ཐུན་མིན་རིག་གནས་སོགས་ལ་སློབ་གཉེར་གནང་པ་དང་། དེ་བཞིན། ༢༠༠༩ ་ལོར་བར་སྡེ་དགེ་དཔལ་ཡུལ་དང་གསེར་རྟ་ལྔ་རིག་ནང་བསྟན་སློབ་གླིང་།  སྡེ་དགེ་ཞེ་ཆེན།   སྡེ་དགེ་རྫོགས་ཆེན། ཡ་ཆེན་སྒར།  ཨ་མདོ་རྔ་པ་ཀིརྟི་དགོན་བཅས་སུ་སློབ་སྦྱོང་དང་གྲྭ་སྐོར་ལ་ཕེབས་ཡོད་འདུག

 

༢༠༠༩  ལོའི་མཇུག་ཏུ་སྐྱ་སར་བབས་ཏེ་ནུབ་བྱང་མི་རིགས་སློབ་གླིང་དུ་ཞུགས་ཏེ་ད་བར་ལོ་ ༤ རིང་རྒྱ་ཡིག་གི་ལམ་ནས་རྩོམ་རིགས་སྐོར་ཆེད་སྦྱང་གནང་ཡོད་པ་དང་། ཕྱི་ལོ་ ༢༠༡༣ ཕྱི་ཟླ་ ༥ པའི་ནང་རྒྱ་གཞུང་གིས་ཞོགས་དྲིལ་དང་སློབ་ཕྲུག་གཞན་ཁ་ཤས་ཀྱིས་ནམ་རྒྱུན་ནུབ་བྱང་མི་རིགས་སློབ་ཆེན་ནང་ཁྲིམས་འགལ་ཐོག་བགྲོ་གླེང་གོ་སྒྲིག་བྱེད་ཀྱིན་ཡོད་པའི་ཉེས་འཛུགས་བྱས་ཏེ་སློབ་གྲྭ་ནས་ཕྱིར་འཕུད་བཏང་ཡོད་འདུག

 

ཕྱི་ཟླ ༦ པའི་ནང་ཕ་ཡུལ་ཁམས་ནགས་ཤོད་འབྲི་རུ་རྫོང་དུ་ལོག་ནས།  <<  མི་རབས་གསར་པའི་མགྲོན་ཁང  >>ཞེས་པ་ཞིག་བཙུགས་ཏེ། ཞོར་དུ་ཟུར་སྦྱོང་འཛིན་གྲྭ་གཉེར་ནས་ན་གཞོན་ཚོར་རིན་མེད་ཐོག་བོད་རྒྱ་ཡིག་རིགས་གཉིས་སློབ་ཁྲིད་བྱས་ཡོད་འདུག   ༢༠༠༧ ལོར་ཁོང་གིས  << ཁ་བ་ལ་འཁྲེང་བའི་དུང་སེམས་ཀྱི་ཅོང་སྒྲ >>  ཞེས་པ་དང་། <<  གངས་རིའི་ལས་དབང >> ཞེས་པའི་རྩོམ་དེབ་གཉིས་སྔ་ཕྱིར་དཔར་སྐྲུན་བྱས་རྗེས། ཀློག་པ་པོ་ཚོས་གདེང་འཇོག་ཆེན་པོ་གནང་ཡོད་པ་དང་། ༢༠༡༢ ལོ་ནས་རིམ་བཞིན་ནུབ་བྱང་མི་རིགས་སློབ་ཆེན་དུ་ཁོང་དང་སློབ་མ་ཁ་ཅིག་མཉམ་རོབ་ཐོག་<< མི་རབས་གསར་པ >>  ཅེས་པའི་ལོ་དེབ་རྩོམ་སྒྲིག་བྱས་ཡོད་པ་དང་། ད་དུང་རྒྱ་ཡིག་ཐོག་ཞོགས་དྲིལ་པོད་ཁུག་ཅེས་པ་གཉེར་ནས། ལྷ་ས་ཁུལ་དུ་རྒྱ་ལུགས་ཤེད་ཆེ་བར་ཟུར་ཟའི་རྩོམ་ཡིག་<<མདོག་ངན་གྱི་ལྷ་ས  >>  ཟེར་བ་དང་།  ཉམ་ཆུང་བོད་མིའི་ལས་དབང་ལ་བསམས་ནས་དཀོན་མཆོག་ལ་ཁ་རྡུང་བཏང་བའི་ <<དཀོན་མཆོག་འཆི་བར་འོས  >>  ཞེས་པ་སོགས་ཀྱི་རྩོམ་ཡིག་མང་པོ་སྤེལ།  ད་ལྟའི་ཆར་བོད་ཀྱི་རིག་གནས་དྲ་བའི་སྟེང་གི་ཁོང་གི་པོད་ཁུག་རྒྱ་གཞུང་གིས་སྒོ་བརྒྱབ་ཡོད་པ་རེད། (http://xiuzheng.tibetcul.com/131613.html#253254)

 

གཡུལ་རྒྱལ་ལགས་ནི་ཁམས་ནགས་ཤོད་འབྲི་རུ་རྫོང་གཤམ་ཆུ་ཤང་སྟེང་མཁར་གྲོང་ནས་ཡིན་ལ།   ད་ལྟ་རང་ལོ་ ༢༦ ཡིན་པ་དང་། ཁོང་ཆུང་དུས་ནས་གཤམ་ཆུ་ཤང་སློབ་ཆུང་དུ་འགྲིམས། ༢༠༠༥ ལོར་རྫོང་ཉེན་རྟོག་ལས་ཁུངས་སུ་ལས་གནས་བསྐོ་བཞག་གིས་ལོ་ ༧ ལས་ཀ་བྱས་ཡོད་ཀྱང་། ཉེན་རྟོག་པ་ནི་ཆབ་སྲིད་ལས་ཀའི་རྙོག་དྲ་ཧ་ཅང་ཆེ་སྟབས།  ༢༠༡༢ ལོར་རང་འགུལ་ཐོག་རྩ་དགོངས་ཞུས་ཏེ་རྫོང་ཐོག་ཏུ་ཚོང་ལས་གཉེར་གྱིན་ཡོད་འདུག ཁོང་གིས་ཉེན་རྟོག་པའི་ལས་ཀ་བྱས་རིང་ཕ་ཡུལ་གྱི་མི་དམངས་ལ་དྲང་བདེན་ལས་ཀ་བྱས་པས་ཕན་ཐོགས་ཆེན་པོ་བྱུང་ཡོད་འདུག གཡུལ་རྒྱལ་ལགས་ཀྱི་བཟའ་ཟླའི་མིང་ལ་ལྷ་སྐྱིད་སྒྲོལ་མ་ཟེར་ཞིང་ཁོང་གཉིས་ལ་ཕྲུ་གུ་གཉིས་ཡོད་འདུག