20/10/2020

རྡོ་བ་གཤར་ཚ་དགོན་པའི་གྲྭ་བ་བཞི་འཇུ་བཟུང་བཙན་འཁྲིད།

  •   
  •  
  •  
  •  
  •  
  •  
  •  

ཉེ་ཆར་རྒྱ་གཞུང་ཉེན་རྟོག་པས་རྡོ་བ་གཤར་ཚ་དགོན་པའི་གྲྭ་པ་བཞི་འཇུ་བཟུང་གིས་ནག་ཆུ་རྫོང་དུ་བཙན་འཁྲིད་བྱས་རྗེས། ད་ལྟའི་ཆར་གནས་ཚུལ་གང་ཡང་ཤེས་རྟོགས་མི་ཐུབ་པར་གར་སོང་ཆ་མེད་དུ་གྱུར་འདུག

འདི་ག་ལྟེ་གནས་ཁང་ལ་གནས་ཚུལ་འབྱོར་དོན། ཕྱི་ལོ་ ༢༠༡༤ ཟླ་ ༢ ཚེས་ ༢ ཉིན། རྒྱ་གཞུང་ཉེན་རྟོག་པས་ཁམས་སོག་རྫོང་ཁྲི་རྡོ་ཞང་རྡོ་བ་གཤར་ཚ་དགོན་པའི་གྲྭ་པ་བཞི་འཇུ་བཟུང་ཐོག བོད་རང་བཙན་ཡིན་ཞེས་པའི་ཡིག་ཆ་ ༤༠ ལྷག་འགྲེམས་བསྒྲགས་དང་། རྒྱ་གཞུང་གིས་སྤྲད་པའི་དགོན་པའི་སྒོ་བྱང་མེད་པ་བཟོས་པ། དགོན་པར་བཅའ་སྡོད་རུ་ཁག་གི་སྒོ་དང་སྒེའུ་ཁུང་ལ་རྡོ་གཞུས་པ་སོགས་ཀྱི་ཉེས་མིང་བཙུགས་ཏེ་སོག་རྫོང་དུ་བཙན་འཁྲིད་བྱས་རྗེས། ད་ལྟའི་ཆར་གྲྭ་བ་དེ་དག་ས་གནས་གང་ཞིག་ཏུ་བཀག་ཉར་བྱས་མེད་སོགས་གནས་ཚུལ་ཅི་ཡང་ཤེས་རྟོགས་མི་ཐུབ་པར་གར་སོང་ཆ་མེད་དུ་གྱུར་འདུག

རྒྱ་གཞུང་གིས་འཇུ་བཟུང་བཙན་ཁྲིད་བྱས་པའི་གྲྭ་དེ་དག་ནི། དཔལ་འགྲུབ་ཚང་གི་གྲྭ་རང་ལོ་ ༢༠ ཡིན་པའི་ཚུལ་ཁྲིམས་དཔལ་བཟང་དང་། བསོད་ཚིམ་ཚང་གི་རང་ལོ་ ༡༥ ཡིན་པའི་གྲྭ་བློ་བཟང་ཡེ་ཤེས། མི་ཆུང་ཚང་གི་རང་ལོ་ ༢༢ ཡིན་པའི་གྲྭ་སྐལ་བཟང་བྱམས་པ། ཨ་གནམ་ཚང་གི་རང་ལོ་ ༢༣ ཡིན་པའི་གྲྭ་སྐལ་བཟང་རྡོ་རྗེ་བཅས་ཡིན་པ་རེད།

ཁམས་སོག་རྫོང་རྡོ་བ་གཤར་ཚ་དགོན་པ་ནི་བོད་རབ་བྱུང་བདུན་པའི་ཆུ་སྟག་ཕྱི་ལོ་ ༡༤༢༢ ཙམ་ལ་ཞུང་ཞུང་ཆོས་དབང་གྲགས་པས་ཕྱག་བཏབ་པ་ཞིག་ཡིན་ལ། ༡༩༥༩ ལོར་རྒྱ་གཞུང་གིས་གཏོར་བཤིག་མ་ཐེབས་པའི་ཡར་སྔོན་དུ། ལོ་ངོ་ ༥༣༨ ཙམ་གྱི་རིང་སྔར་ཡོད་ཕྱག་རྒྱུན་མ་ཉམས་པར་རྒྱུན་འཛིན་གྱི་ལོས་རྒྱུས་ལྡན་པའི་དགོན་པ་ཞིག་ཆགས་ཡོད། དགོན་པའི་ཆོས་རྒྱུད་ནི་དགེ་ལུགས་པ་ཡིན་འདུག