12/12/2019

བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས། ༢༠༡༨ ལོའི་སྙན་ཐོ།

  •   
  •  
  •  
  •  
  •  
  •  
  •  

འདི་ག་ལྟེ་གནས་ཁང་གི་ངོས་ནས་ཕྱི་ལོ་༢༠༡༨ ལོའི་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་སྐོར་གྱི་ལོ་འཁོར་སྙན་ཐོ་འདོན་སྤེལ་བྱས་ཡོད།

ཕྱི་ལོ་༢༠༡༨ ལོ་ནི་བོད་གཙོ་བའི་རྒྱ་ནག་རྒྱལ་ཡོངས་ཀྱི་འགྲོ་བ་མིའི་ཐོབ་ཐང་ཐད་ནས་གཉན་འཕྲང་ཅན་གྱི་ལོ་ཞིག་ཆགས་ཡོད། རྒྱ་གཞུང་གིས་ཁྲིམས་སྒྲིག་གསར་བ་མང་པོ་གཏན་འབེབས་ལག་བསྟར་བྱས་པ་དེས། བོད་མིའི་གནས་སྟངས་དང་འགྲོ་བ་མིའི་ཐོབ་ཐང་ཁག་ལ་དམ་དྲག་ཤུགས་ཆེར་བཏང་ཡོད། ཁྲིམས་སྒྲིག་དེ་དག་གི་འོག་ཏུ་འཚོ་གནས་ཚད་ལྡན་བསྐྱེལ་བའི་ཐོབ་ཐང་དང་། ཆོགས་ལུགས་རིག་གཞུང་གི་ཐོབ་ཐང་། འགྲོ་འོང་གི་རང་དབང་། ཞི་བའི་འདུ་འཛོམ་རང་དབང་། དེ་མིན་གྱི་རང་དབང་ཐོབ་ཐང་ཁག་ལོངས་སུ་སྤྱོད་མཁན་བོད་མི་ཚོ་གང་བྱུང་འཛིན་བཟུང་དང་བཀག་ཉར་བྱས་ཡོད།

ཕྱི་ལོ་༢༠༡༨ ཟླ་༡ ནས་བཟུང་རྒྱ་ནག་རྒྱལ་ཡོངས་སུ་ནག་སེལ་གཤེད་བཅོམ་གྱི་ཆེད་དོན་འཐབ་རྩོད་ཟེར་བའི་ཁྲོད་དུ“ནག་གཤེད་སྟོབས་ཤུགས”དང་“ནག་ཚོགས་སྟོབས་ཤུགས”རིགས་རྩ་མེད་བཟོ་རྒྱུ་ཡིན་རབས་བཤད་དེ། རྒྱ་གཞུང་གིས་དུས་ཡུན་རིང་བོར་བོད་ནང་གི་འགྲོ་བ་མིའི་ཐོབ་ཐང་ཁག་རྡོལ་རོལ་བརྡལ་བཤིག་བཏང་དང་གཏོང་བཞིན་པ་དེ་ཁྲིམས་མཐུན་གྱི་ངོ་བོར་བསྒྱུར་འདུག དྲག་རྡུང་གི་ལས་འགུལ་དེ་དག་ནི་བོད་ནང་ལ་གསར་དུ་སྤེལ་བ་ཞིག་མིན་ནའང་། ཡོངས་ཁྱབ་རང་བཞིན་གྱི་སྒོ་ནས་མི་མང་ལ་ནག་མེད་ཉེས་འཛུགས་བྱེད་ཐབས་ཀྱི་ལས་འགུལ་འདི་ནི་སྔར་མ་བྱུང་བའི་གནས་སྟངས་ཚབས་ཆེན་ཞིག་ཆགས་ཡོད། དེ་ཡང་བོད་མིའི་རིག་གཞུང་རྒྱུན་འཛིན་དར་སྤེལ་གྱི་བྱེད་སྒོ་དང་སྤྱི་ཚོགས་བདེ་དོན་དང་འབྲེལ་བའི་བྱ་འགུལ། གཞན་ཡང་བོད་རིགས་དཀྱུས་མའི་གནས་སྟངས་ཡར་རྒྱས་གཏོང་ཐབས་ཀྱི་དམངས་ཁྲོད་དང་བླངས་ཞབས་ཞུའི་རིགས་ཚང་མ་དྲག་རྡུང་ལས་འགུལ་དེའི་འོག་ཏུ་བཅུག་འདུག དོན་དངོས་སུ་ནག་སེལ་གཤེད་བཅོམ་གྱི་ཆེད་དོན་དམག་འཐབ་ཟེར་བ་དེ་ནི་དམར་ཤོག་སྲིད་གཞུང་སྲ་བརྟན་དང་དབང་ཤུགས་ཁྱབ་ཆེར་བཏང་སྟེ། གཞི་རིམ་ཁྲིམས་འཛིན་ཁྱབ་ཁོངས་ཁག་དང་མཉམ་འབྲེལ་བྱེད་ཐབས་ཤིག་ཡིན་འདུག འདས་པའི་ལོ་ངོ་འདི་དག་གི་རིང་ལ་ཞིབ་འཇུག་རྒྱུས་ལོན་བྱས་པ་ལྟར་ན། ལས་འགུལ་དེ་ནི་གོང་རིམ་ནས་གཞི་རིམ་མང་ཚོགས་བར་གྱི་དམར་ཤོག་ཚོགས་པའི་ཆབ་སྲིད་དབང་ཤུགས་སྲ་བརྟན་བཟོ་ཐབས་གྱི་འབད་བརྩོན་ཤུགས་ཆེར་བཏང་སྟེ། བོད་ས་ཡོངས་སུ་སྔར་ལས་ལྷག་པར་དམ་དྲག་དང་དྲག་གནོན་བྱས་ནས་བོད་ཡུལ་ནི་འགྲོ་བ་མིའི་ཐོབ་ཐང་མེད་པའི་མུན་ནག་གི་ལུང་བ་ཞིག་ཏུ་བསྒྱུར་རྒྱུ་དེ་ཡིན་པ་གསལ་ཡོད།

བོད་མི་ཚོ་གང་བྱུང་འཛིན་བཟུང་བཀག་ཉར་དང་དུས་ཡུན་རིང་བོར་ཁྲིམས་འགལ་བཀག་བསྐྱིལ་བྱས་ཏེ། ཁྲིགས་སྒྲིག་ལག་བསྟར་བྱེད་མཁན་དཔོན་རིགས་ཚོར་དྲག་སྤྱོད་ཀྱི་མིང་ཐོག་ནས་བོད་མི་ཚོར་ཁྲིམས་འགལ་ལུགས་འགལ་གྱི་ཐོག་ནས་སྡུག་སྦྱོང་མནར་གཅོད་བཏང་ནས་བཙན་དབང་གིས་ཉེས་འཛུགས་ཁས་ལེན་དུ་བཅུག་ཆོག་པའི་དབང་ཆ་སྤྲད་ཡོད་པ་རེད། བོད་མི་ཚོར་དྲང་བདེན་གྱི་ཁྲིམས་ཞིབ་ཐོབ་ཐང་མེད་པ་དང་། ལྷག་པར་དུ་ཆབ་སྲིད་དང་འབྲེལ་ཡོད་ཚོར་དྲང་བདེན་གྱི་ཁྲིམས་ཞིབ་བྱས་མི་འདུག དོན་དངོས་སུ་ད་བར་དུ་དྲང་བདེན་གྱི་ཁྲིམས་ཞིབ་བྱས་པའི་བོད་མི་ཞིག་ཧ་ལམ་མེད་པའི་གནས་སྟངས་ཆགས་ཡོད།

བོད་མི་ཚོ་བོད་ཕྱི་ནང་གཉིས་སུ་འགྲུལ་སྐྱོད་མི་ཆོག་པའི་བཀའ་ཁག་ཇེ་ཆེར་ཕྱིན་འདུག ཞིབ་བཤེར་ས་ཚིགས་དང་བཀག་སྡོམ་འགག་སྒོ་མང་དུ་བཙུགས་པ་དང་། ཕྱི་སྐྱོད་ལམ་ཡིག་བཀག་འགོག་བྱས་ཏེ། བོད་མི་ཚོ་འགྲུལ་སྐྱོད་བྱ་རྒྱུ་ནི་ཧ་ལམ་མི་སྲིད་པའི་གནས་སྟངས་བཟོས་འདུག ཆེད་མཁས་པ་ཁ་ཤས་ཀྱིས། ལྷ་སར་ཕོ་བྲང་པོ་ཏ་ལར་མཇལ་སྐོར་གནང་རྒྱུ་ནི་གནམ་ཐང་དུ་འགྲོ་རྒྱུ་ལས་ཀྱང་དཀའ་ཁག་ཆེ་སྐོར་བརྗོད་ཡོད།

“བོད་བརྒྱུད་ནང་བསྟན་ཆོས་ལུགས་དེ་ཀྲུང་གོའི་ཁྱད་ཆོས་ལྡན་པའི་སྤྱི་ལུགས་རིང་ལུགས་དང་འཚམ་མཐུན་དང་།” “ཆོས་ལུགས་ཀྲུང་གོ་ཅན་ལ་བསྒྱུར་བའི་སྲིད་ཇུས”དེ་གཉིས་ཀྱི་ནང་དུ་བོད་མིའི་ཆོས་ལུགས་དད་མོས་རང་དབང་དམིགས་འབེན་དུ་བཟུང་འདུག སྲིད་ཇུས་དེ་དག་གི་འོག་ཏུ་བོད་རིགས་གྲྭ་ཕྲུག་མང་པོ་རང་དགོན་ནས་ཕྱིར་ཕུད་བཏང་སྟེ་རྒྱ་ནག་གཞུང་གཉེར་སློབ་གྲྭ་ཁག་གི་ནང་དུ་བཙན་འཇུག་བྱས་པ་དང་། ས་གནས་དགོན་སྡེ་ཁག་ནང་བོད་སྐད་ཡིག་ཟུར་ཁྲིད་བྱ་བར་བཀག་སྡོམ་བྱས་འདུག

བོད་ནང་དུ་རང་བྱུང་ཁོར་ཡུག་གི་བདེ་ཐང་དང་འཚོ་གནས་ཚད་ལྡན་བསྐྱེལ་བའི་ཐོབ་ཐང་ཁག་མུ་མཐུད་དུ་ཉམས་རྒུད་གཏོང་བཞིན་འདུག་ལ། ས་ཆའི་བདག་དབང་དང་། གཙང་ཆུ་འབག་བཙོག རྩྭ་ཐང་ཉམ་རྒུད་དང་བྱེ་འགྱུར་སོགས་ཀྱི་དཀའ་ཉེན་ཇེ་ཆུང་དུ་གཏོང་རྒྱུར། བོད་མི་ཚོས་རྒྱ་གཞུང་གི་གཏན་འབེབས་སྲིད་ཇུས་ཁག་ལ་གཏོང་ལེན་གནང་ཐབས་མེད་པ་ཆགས་འདུག

ཕྱི་ལོ་༢༠༡༨ ལོའི་ལོ་འཁོར་སྙན་ཐོ་འདིའི་ནང་དུ་རྒྱལ་སྤྱིའི་སྤྱི་ཚོགས་ཀྱི་ངོས་ནས་དོ་ཁུར་མ་བྱས་པ་དང་བོད་ནང་དུ་ཉིན་རེ་བཞིན་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པ་གསལ་འདོན་བྱས་ཡོད། ལོ་འཁོར་སྙན་ཐོ།  ཕྱི་ལོ་༢༠༡༨ ལོར་རྒྱ་ནག་དམར་ཤོག་གཞུང་གི་དྲག་གནོན་དབང་སྒྱུར་གྱིས་བོད་མི་མང་ལ་ཤུགས་རྐྱེན་ཅི་འདྲ་ཐེབས་མིན་སྐོར་གྱི་སྙན་ཐོ་ཆ་ཚང་ཀློག་ཐུབ།

གཞན་ཡང་འབྲེལ་ཐགལོ་འཁོར་སྙན་ཐོ། རྒྱ་ཡིག འདི་བརྒྱུད་ནས་རྒྱ་ཡིག་སྙན་ཐོ་ཆ་ཚང་ཀློག་ཐུབ།