20/10/2020

དམིགས་བསལ་སྙན་ཐོ། གཞི་རྒྱ་ཆེ་བའི་དོགས་ཟོན་མྱུལ་ཞིབ་དང་བརྒྱུད་ལམ་ཞིབ་བཤེར་འོག་ཏུ་བོད་ནང་གི་འགྲོ་བ་མིའི་ཐོབ་ཐང་རྡོག་རོལ་ཁྱབ་ཆེར་བཏང་འདུག

  •   
  •  
  •  
  •  
  •  
  •  
  •  


རྒྱ་གཞུང་གིས་གཞི་རྒྱ་ཆེ་བའི་དོགས་ཟོན་མྱུལ་ཞིབ་དང་བརྒྱུད་ལམ་ཞིབ་བཤེར་ཤུགས་ཆེར་ཁྱབ་ཆེར་ལག་བསྟར་བྱས་ཏེ། བོད་ནང་དུ་མུ་མཐུད་ཁྲིམས་འགལ་གྱི་ཐོག་ནས་བོད་མིའི་འགྲོ་བ་མིའི་ཐོབ་ཐང་རྡོག་རོལ་བཏང་ཡོད། ཕྱི་ལོ་༢༠༠༨ ལོར་བོད་ས་ཡོངས་སུ་བོད་ལ་རང་དབང་དགོས་པ་དང་། ༸གོང་ས་སྐྱབས་མགོན་ཆེན་པོ་མཆོག་ཕྱིར་བོད་ལ་ཕེབས་འཇུག་དགོས་པའི་ཞི་རྒོལ་སྐད་འབོད་གནང་བ་ནས་བཟུང་། རྒྱ་གཞུང་གི་དབང་འཛིན་དཔོན་རིགས་ཚོས་དམ་དྲག་སྟངས་འཛིན་ཤུགས་ཆེར་བཏང་ནསཞི་རྒོལ་ལས་འགུལ་དེའི་རིགས་ཡང་བསྐྱར་འབྱུང་མི་ཐུབ་པ་བཟོ་བཞིན་ཡོད། ཕྱི་ལོ་༢༠༡༢ ལོ་ནས་དམར་ཤོག་སྲིད་གཞུང་གིས་སྤྱི་ཚོགས་སྟངས་འཛིན་དོ་དམ་བྱེད་ཐབས་ཤུགས་ཆེ་རུ་བཏང་བ་དེས། བོད་ནང་ལོགས་ཀྱི་དངོས་ཡོད་གནས་སྟངས་མཐོང་ཐོས་མེད་པ་བཟོས་ཤིང་། བཙན་དབང་གིས་བོད་རྒྱུ་སྒྱུར་བྱེད་ཐབས་ཤུགས་ཆེར་བཏང་ཡོད།

འདི་ག་ལྟེ་གནས་ཁང་ནས་དེ་རིང་གསར་དུ་བཏོན་པའི་སྙན་ཐོ་འདིའི་ནང་དུ། རྒྱ་གཞུང་གིས་མང་ཚོགས་ཡོངས་སུ་རྫོགས་པར་དོགས་ཟོན་མྱུལ་ཞིབ་ཁྱབ་ཆེར་བཏང་བའི་དབང་གིས། བོད་ཕྱི་ནང་གི་བོད་མི་ཚོས་ཕན་ཚུན་ལ་དོགས་ཟོན་བྱེད་དགོས་ཆགས་པར་མ་ཟད། ཐ་ན་སོ་སོ་རང་ཉིད་ལའང་གཟབ་དགོས་བྱུང་བའི་གནས་སྟངས་འཁོད་ཡོད། “དྲ་མིག་ཅན་གྱི་དོ་དམ”དང“གཉིས་ལྡན་དུད་སྦྲེལ”ཟེར་བ་སོགས་གཞི་རྒྱ་ཆེ་བའི་དོགས་ཟོན་མྱུལ་ཞིབ་ཀྱི་བྱེད་ཐབས་སྣ་ཚོགས་བཏོན་ནས། བོད་མི་ཕན་ཚུན་དབར་ལྐོག་ཉན་ལྐོག་ཞུ་དང་ཕན་ཚུན་གཡོ་བཙོང་མ་བྱས་ན་མཇུག་འབྲས་ཚབས་ཆེན་འཁུར་དགོས་པའི་འགན་འཁྲི་བཀོད་ཁྱབ་བཏང་ཡོད།

<<བོད་ནང་གི་བརྒྱུད་ལམ་ཞིབ་བཤེར་དང་དོགས་ཟོན་མྱུལ་ཞིབ་>>ཅེས་པའི་སྙན་ཐོ་འདིའི་ནང་དུ། རྒྱ་གཞུང་གིས་བོད་མི་ཕན་ཚུན་དབར་ལྐོག་ཉན་ལྐོག་ཞུ་བྱེད་དུ་བཅུག་ནས། བོད་མི་ཚོས་ཆབ་སྲིད་ཀྱི་དྲག་གནོན་དང་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པར་ཞི་རྒོལ་དང་ཡང་ན་སོ་སོའི་སྲིད་དོན་དང་རིག་གཞུང་ངོ་བོ་སོགས་གླེང་སློང་ཙམ་ཡང་བྱས་མི་ཆོག་པའི་འཇིགས་སྐུལ་བཏང་བའི་གནས་སྟངས་གསལ་ཡོད། སྙན་ཐོའི་ནང་འཁོད་ལྟར། བོད་ནང་དུ་ལག་ལེན་བསྟར་བཞིན་པའི་དོགས་ཟོན་མྱུལ་ཞིབ་དང་བརྒྱུད་ལམ་ཞིབ་བཤེར་བྱེད་ཐབས་དེ་ཡང་སྲིད་གཞུང་གི་བཙན་དབང་དང་འཁོན་འཛིང་ཁྲིམས་ཆད་མ་ཕོག་སྔོན་ནས་རང་བཤེར་རང་རྟོགས་ཀྱི་སྒྲིག་སྲོལ་གྱི་རྣམ་པར་བཟོས་འདུག་ཅིང་། རང་དང་རང་གི་ནང་མི་སྤུན་མཆེད་སོགས་ལ་བཙོན་འཇུག་མནར་གཅོད་ཀྱི་ཉེས་ཆད་གཅོད་པར་ཞེད་སྣང་གིས། བཙན་དབང་དེའི་འོག་ཏུ་བོད་མི་མང་པོར་འདོད་མོས་མེད་བཞིན་དུ་དམར་ཤོག་སྲིད་གཞུང་གི་ཁེ་ཕན་སྲུང་སྐྱོབ་དང་རང་བཤེར་བྱེད་དགོས་བྱུང་བ་ནི་ཧ་ཅང་བློ་འཚབ་སྐྱེ་གཞི་ཆགས་ཡོད་ལ། དེ་ནི་རྒྱ་ནག་སྲིད་གཞུང་གིས་མང་ཚོགས་རྣམས་ ‘རྒྱལ་གཅེས་རིགས་ལུགས་དང་’ ‘ཡིད་རྟོན་བློ་དཀར་’ ཡོང་ཆེད་ཀྱི་ཆབ་སྲིད་ལྟ་གྲུབ་སྤེལ་ཐབས་མང་པོ་ཞིག་དང་གཅིག་མཚུངས་ཆགས་ཡོད།

དེར་མ་ཟད། “དྲ་མིག་ཅན་གྱི་དོ་དམ་”གཏན་འབེབས་འོག་ཏུ་ཁུལ་རྫོང་ཆ་བགོས་ཀྱིས་ལྟ་རྟོག་དང་དོགས་ཟོན་མྱུལ་ཞིབ་བྱས་ནས། དོགས་གཞིའི་ས་གནས་ཁག་ཏུ་“དམངས་ཕན་ཉེན་རྟོག་ལས་དོན་ཞབས་ཞུ་ས་ཚིགས”ཟེར་བ་སྟོང་ཕྲག་མང་པོ་བཙུགས་ནས་བརྙན་མིག་པར་ཆས་སྤྱད་ནས་མང་ཚོགས་ཀྱི་འགྲོ་འདུག་སྤྱོད་གསུམ་ལ་ཞིབ་བཤེར་བྱེད་མུས་རེད། ཉེན་རྟོག་པ་འདིའི་རིགས་བོད་ལྗོངས་ནང་ཡོང་སའི་ས་ཚིགས་ཁག་ཏུ་འགྲེམ་འཇོག་བྱས་ཡོད་པར་མ་ཟད། བོད་ལྗོངས་ཀྱི་གྲོང་སྡེ་༥༤༦༤ ནང“དམངས་ཕན་ཉེན་རྟོག་ལས་དོན་ཞབས་ཞུ་ས་ཚིགས”འཛུགས་འཆར་ཡོད་པ་དང་། དམིགས་ཡུལ་གཙོ་བོ་བོད་ས་ཡོངས་སུ་ཏང་དང་རྒྱལ་ཁབ་ཀྱི་དབང་ཤུགས་མ་ཁྱབ་པ་མེད་པ་བཟོ་རྒྱུ་དེ་རེད།

བརྒྱུད་ལམ་ཞིབ་བཤེར་དང་དོགས་ཟོན་མྱུལ་ཞིབ་ལག་བསྟར་བྱས་པ་དང་མཉམ་དུ་རྒྱུད་རྒྱུ་འབོར་ཆེན་བསྡུ་ལེན་བྱས་ཏེ། རྒྱ་ནག་ནི་དོགས་ཟོན་མྱུལ་ཞིབ་ཀྱི་ཚན་རྩལ་སྔོན་ཐོན་རྒྱལ་ཁབ་ཅིག་ཏུ་བསྐྲུན་ཐབས་བྱས་ཡོད་པ་དང་། ཉེན་རྟོག་པས་ཁྲིམས་འགལ་ཉེས་གསོག་ལ་རྡུང་རྡེག་གཏོང་བའི་མིང་ཐོག་ནས། ཆབ་མདོ་གྲོང་ཁྱེར་ནང་རྒྱུད་རྒྱུ་བསྡུ་ལེན་དང་འབྲེལ་བའི་ལས་གཞིའི་མ་ལག་བཙུགས་རྗེས། ཕྱི་ལོ་༢༠༡༩ ཚེས་༦ པའི་ནང་རྒྱ་གཞུང་གིས་ཚོད་ལྟའི་ཚུལ་དུ་ཆབ་མདོ་ས་ཁུལ་གྱི་ཡུལ་མིའི་རྒྱུད་རྒྱུ་བསྡུ་ལེན་བྱས་ཡོད་པ་དང་། ཆབ་མདོ་ནི་མི་འབོར་༦༥༧༥༠༥ ཟིན་པའི་བོད་ལྗོངས་ཀྱི་གྲོང་ཁྱེར་ཆེ་ཤོས་ཨང་གསུམ་པ་ཡིན་ཞིང་། རྒྱུད་རྒྱུ་བསྡུ་ལེན་གྱི་ལས་གཞི་དེའི་ནང་དུ་སྲིད་གཞུང་གི་སྡེ་ཁག་རིམ་པ་དང་། དགོན་སྡེ་ཁག ཞིང་འབྲོག་གི་སྤྱི་ཚོགས་ཁག་ཚང་མ་བཅུག་ནས། ཡུལ་མི་ཚོའི་མཛུབ་རྗེས་དང་ཁྲག་རིགས། མིག་བཤེར་སོགས་ཚུད་པའི་ཆ་འཕྲིན་བསྡུ་ལེན་བྱས་འདུག

སྙན་ཐོ་འདིའི་ནང་གསལ་གྱི་ཁུངས་སྐྱེལ་ཡིག་ཆ་གཅིག་ནི། མཚོ་སྔོན་ཞིང་ཆེན་མཚོ་བྱང་བོད་རིགས་རང་སྐྱོང་ཁུལ་མདོ་ལ་རྫོང་ནས་ཡིན་པའི་བོད་མི་ཞིག་ཕྱི་ལོ་༢༠༡༦ ལོར་ཕྱིར་ཕ་ཡུལ་ལ་གཉེན་འཕྲད་དུ་ཕྱིན་སྐབས། ཟི་ལིང་གྲོང་ཁྱེར་ནས་ཁོས་ཞིང་ཆེན་རིམ་པའི་འཐབ་ཕྱོགས་གཅིག་གྱུར་ཁང་སོང་ནས་ལ་ཁོང་ཕྱིར་ཕ་ཡུལ་ལ་ཐོན་པའི་གནས་ཚུལ་ཡར་ཞུ་དགོས་པ་དང་། དེ་གར་རྒྱ་གཞུང་གི་ལས་བྱེད་ཚོས་ཁོང་ལ་ཀུ་ཤུ་རྟགས་ཅན་གྱི་ཁ་པར་ཐོན་རིམ་བཞི་བ་ཞིག་བྱིན་ནས་ཕ་ཡུལ་དུ་བསྡད་རིང་ཁ་པར་དེའི་ཐོག་ནས་འབྲེལ་གཏུག་བྱེད་དགོས་ལུགས་དང་། ཁོ་རང་སྒེར་གྱི་ལག་འཁྱེར་ཁ་པར་ལ་སྔོག་བཤེར་བྱས་ནས་བེད་སྤྱོད་མི་ཆོག་པ་བཟོས་འདུག མ་ཟད་ཁོས་ཕ་ཡུལ་གྱི་མཛེས་ལྗོངས་ཁོར་ཡུག་བརྙན་པར་དུ་བླངས་མི་ཆོག་པ་དང་། ཕ་ཡུལ་གྱི་གནས་ཚུལ་རྒྱ་གར་གྱི་བོད་མིར་བཤད་མི་ཆོག་པར་གསལ་བཤད་བྱས་འདུག ཁོང་ལ་སྤྲད་པའི་ཀུ་ཤུ་རྟགས་ཅན་གྱི་ཁ་པར་ཐོན་རིམ་བཞི་བ་དེའི་ནང་དུ་མྱུལ་ཞིབ་ཀྱི་མཉན་ཆས་བླུགས་ནས་རང་འགུལ་གྱིས་བརྙན་ལེན་དང་སྒྲ་འཇུག་བྱེད་པ་དང་། དེ་ལ་བརྟེན་ནས་རྒྱ་གཞུང་གི་ལས་བྱེད་ཚོས་ཁོང་གར་སོང་གང་འདུག་ལ་རྗེས་འདེད་བཏང་ནས་ལྟ་རྟོག་བྱེད་བཞིན་ཡོད་པ་དང་། གནས་ཚུལ་དེ་ནི་ཁོས་ཡུལ་མི་ཚོའི་ས་ནས་ཤེས་རྟོགས་བྱུང་བ་རེད།

སྙན་ཐོ་འདིའི་ནང་དུ། རྒྱ་གཞུང་གིས་བོད་མི་ཚོར་བཙན་གྱིས་རང་བཤེར་བྱེད་དུ་འཇུག་པ་དང་བོད་མིའི་ཐོབ་ཐང་རྡོག་རོལ་གཏོང་བཞིན་པ་དེ་ནི། བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་གཅིག་པུ་ཙམ་མིན་པར། རྒྱ་ནག་རྒྱལ་ཡོངས་གཙོས་ཕྱིའི་རྒྱལ་ཁབ་ཁག་ཏུ་ཡང་ཁྱབ་ཆེར་ཚབས་ཆེར་ཕྱིན་པ་ཡོད་པ་དང་། དེ་ནི་རྒྱ་གཞུང་གི་དབང་ཤུགས་རྒྱ་སྐྱེད་ཐབས་ཀྱི་བརྒྱུད་ལམ་ལ་བསྟེན་ནས་བྱུང་བའི་ཐ་ཚིག་བསྒྲགས་ཡོད་ལ། སྙན་ཐོ་འདིའི་མཇུག་ཏུ། འཛམ་གླིང་རྒྱལ་ཁབ་ཁག་དང་གཞུང་འབྲེལ་མིན་པའི་ཚོགས་པ་ཁག མཉམ་འབྲེལ་ཚོགས་སྡེ་དང་མི་སྒེར་ཚང་མས་སྟོབས་ཤུགས་གཅིག་སྒྲིལ་ཕྱར་བ་གྲུ་འདེགས་ཀྱི་སྒོ་ནས་མི་སྒེར་སོ་སོའི་རང་དབང་ཐོབ་ཐང་གི་རིན་ཐང་ལྟ་ཚུལ་དང་། དེ་འབྲེལ་གྱི་བློ་འཚབ་ཅི་བྱུང་གསལ་སྟོན་གྱིས། ཁྱབ་ཆེར་ཤུགས་ཆེར་སྤེལ་བཞིན་པའི་རྒྱ་གཞུང་གི་བརྒྱུད་ལམ་ཞིབ་བཤེར་དང་དོགས་ཟོན་མྱུལ་ཞིབ་ལ་འགོག་རྒོལ་གནང་བའི་སྐུལ་འདེབས་བྱས་ཡོད།

འབྲེལ་ཐག་འདི་བརྒྱུད་ནས་སྙན་ཐོ་ཆ་ཚང་ཀློག་ཐུབ།