16/12/2019

དགེ་འདུན་པ་ཞིག་གིས་ཞི་རྒོལ་གནང་བར་བརྟེན་ནས་ལོ་གསུམ་ལ་བཙོན་འཇུག་བྱས་པ་ད་ལྟ་གློད་གྲོལ་བྱུང་འདུག

  •   
  •  
  •  
  •  
  •  
  •  
  •  

             བདུན་ཕྲག་སྔོན་པའི་གཟའ་ལྷག་པའི་ཉིན། དགེ་འདུན་པ་ཞིག་ལོ་གསུམ་གྱི་བཙོན་འཇུག་དུས་ཡུན་ཚང་ནས་གློད་གྲོལ་བྱུང་འདུག

ཨ་མདོ་རྔ་བ་ཀིརྟི་དགོན་ནས་ཡིན་པའི་དགེ་འདུན་པ་བློ་བཟང་རྒྱ་མཚོ་ལགས་ཀྱིས་དེ་སྔ་ཕྱི་ལོ་༢༠༡༤ཟླ་༤ཚེས་༢ཉིན། རྔ་བའི་རྫོང་ཐོག་ནས། ལག་བྲིས་རྒྱབ་པའི་བོད་ཀྱི་རྒྱལ་དར་འཕྱར་ཞོར། ༸གོང་ས་མཆོག་བོད་དུ་ཕེབས་བཅུག་དགོས་ཡོད། བོད་ལ་རང་དབང་དགོས་སོགས་ཀྱི་འབོད་ཚིག་བསྒྲགས་པ་ལ་བརྟེན། རྒྱ་གཞུང་གིས་འཇུ་བཟུང་བཀག་ཉར་དང་། རྗེས་སུ་འབར་ཁམས་འབྲིང་རིམ་མི་དམངས་ཁྲིམས་ཁང་གིས་ཁོང་ལ་ལོ་གསུམ་གྱི་བཙོན་འཇུག་ཁྲིམས་བཅད་པ། ད་ལྟ་བཙོན་དུས་ཚོང་ནས། ཟླ་འདིའི་ཕྱི་ཚེས་༡༩ཉིན་གློད་གྲོལ་བྱུང་ཡོད་འདུག

བློ་བཟང་རྒྱ་མཚོ་ལགས་ཀྱིས་ཁེར་རྐྱང་ངོ་རྒོལ་བྱས་ནས་ཉེན་རྟོག་པ་སླེབས་མཚམས། ཁོ་རང་བྲོས་ནས་སོང་རྐྱེན་དེ་མུར་འཇུ་བཟུང་ཐུབ་མེད་ཀྱང་། ཉིན་བཅུ་གསུམ་གྱི་རྗེས་སྟེ། ཕྱི་ལོ་༢༠༡༤ཟླ་༤ཚེས་༡༥ཉིན། ཁོང་ཕྱིར་དགོན་པར་སླེབས་པ་དང་བསྟུན་ནས་འཇུ་བཟུང་བཙན་འཁྲིད་ཀྱི་གང་དུ་བཀག་ཉར་ཡོད་མེད་སོགས་ནང་མིར་བརྡ་ལན་བྱས་མེད་པ་མ་ཟད། ནང་མིར་ཁྲིམས་རྩོད་པའང་གླ་རུ་བཅུག་མི་འདུག ཁྲིམས་ར་འཚོགས་སྐབས་ནང་མི་ཟུར་ཉན་དུ་སྐད་བཏང་ཡོད་འདུག  ཡང་འདི་ག་ལྟེ་གནས་ཁང་གིས་དེ་སྔ་གནས་ཚུལ་བཏོན་པའི་ནང་དུ། བློ་བཟང་རྒྱ་མཚོ་ཡི་འཛིན་གྲོགས་བློ་བཟང་བསྟན་པ་ཞེས་པ་ཞིག་ཀྱང་ལོ་གཉིས་ཀྱི་བཙོན་འཇུག་དུས་ཡུན་ཚང་ནས་སྔར་ལོར་ཁྲིན་ཏུ་ཡི་ལོ་ན་མ་སྨིན་པའི་བཙོན་ཁང་ཞེས་པ་ནས་གློད་གྲོལ་བྱུང་ཡོད་འདུག་ལ། དེ་སྔ་བློ་བཟང་རྒྱ་མཚོའི་ཁེར་རྐྱང་ངོ་རྒོལ་བྱས་པ་བརྟེན་ནས་རྒྱ་གཞུང་གིས་འཇུ་བཟུང་བྱས་པའི་ཉིན་ཤས་རྗེས། བློ་བཟང་བསྟན་པ་ལགས་ཀྱིས་ཀྱང་གཅིག་པུ་ཁྲོམ་དུ་ཐོན་ནས་ཁེར་རྐྱང་ངོ་རྒོལ་གནང་བ་རེད་འདུག རྒྱ་གཞུང་གིས་དེ་མུར་བློ་བཟང་བསྟན་པ་འཇུ་བཟུང་བྱས་རྗེས་ཟླ་བ་བརྒྱད་ཀྱི་རིང་ནང་མི་དང་འབྲེལ་བ་རྩ་བཅད་ཀྱི་བཀག་ཉར་བྱས་ཤིང་། གསང་བའི་བཀག་ཉར་གྱི་དུས་ཡུན་རིང་ལ་མི་སྤྱོད་ལས་འདས་པའི་གཅར་རྡུང་དང་འདྲི་བརྩད་ལན་མང་བྱས་ཡོད་འདུག ཕྱི་ལོ་༢༠༡༤ཟླ་༡༡ཚེས་༢༤ཉིན། བློ་བཟང་བསྟན་པ་ལ་རྒྱལ་ཁབ་ཀྱི་བྱ་འགུལ་ལ་ངོ་རྒོལ་བྱས་པའི་ཉེས་འཛུགས་འོག་ཁྲིམས་ཐག་བཅད་ཡོད་འདུག རང་ལོ་༢༣ཡིན་པའི་དགེ་འདུན་པ་བློ་བཟང་རྒྱ་མཚོ་ལགས་ཀྱི་ད་ལྟའི་གཟུགས་གཞིའི་གནས་བབ་ཤེས་རྟོགས་མ་ཐུབ་ཀྱང་། གློད་གྲོལ་བྱུང་མཚམས་ཀྱི་པར་ངོས་སུ་གཟུགས་བབ་སྐྱོ་བོ་རེད་འདུག བཙོན་གྲོལ་བྱུང་བའི་ཁོང་ལ་ནང་མི་དང་གཉེན་ཉེ་ཡུལ་མིའི་ངོས་ནས་གཞི་རྒྱ་ཆེ་བའི་སྣེ་ལེན་ཕེབས་བསུ་ཞུས་འདུག འདི་ག་ལྟེ་གནས་ཁང་གི་ཆབ་སྲིད་བཙོན་པའི་མིང་གཞུང་ཐོ་འགོད་ཚན་པ་ལྟར་ན། ཕྱི་ལོ་༢༠༡༤ནས་ད་ལྟའི་བར་བོད་ནང་ནས་ཁེར་རྐྱང་ངོ་རྒོལ་གནང་བ་ཤེས་རྟོགས་བྱུང་བའི་མི་གྲངས་༢༤དང་། དེ་དག་ཁྲོད་མང་ཤོས་ནི་རྔ་བ་ཀིརྟ་དགོན་གྱི་དགེ་འདུན་པ་དང་། ལྷག་པར་ད་ལྟའི་བར་རང་ལུས་མེར་བསྲེགས་ཀྱི་གྲངས་འབོར་མང་ཤོས་བྱུང་ས་རྔ་བ་ས་ཁུལ་ཡིན་པ་གསལ་འདུག