12/11/2019

གྲྭ་ངག་དབང་རྒྱལ་མཚན་རྒྱ་གཞུང་ཉེན་རྟོག་པས་གློ་བུར་བཙན་ཁྲིད།

  •   
  •  
  •  
  •  
  •  
  •  
  •  
རྒྱ་གཞུང་གིས་གློ་བུར་བཙན་འཁྲིད་བྱས་པའི་གྲྭ་ངག་རྒྱལ་མཚན་གྱི་འདྲ་པར།
རྒྱ་གཞུང་གིས་གློ་བུར་བཙན་འཁྲིད་བྱས་པའི་གྲྭ་ངག་རྒྱལ་མཚན་གྱི་འདྲ་པར།

གྲྭ་ངག་དབང་རྒྱལ་མཚན་རྒྱ་གཞུང་གིས་གློ་བུར་འཇུ་བཟུང་བཙན་འཁྲིད་ཀྱིས་གར་སོང་ཆ་མེད་དུ་གྱུར་ཡོད་སྟབས། ས་གནས་ཡུལ་མིས་བརྩད་གཅོད་སྐབས་ནག་ཆུའི་ཉེན་རྟོག་ཁང་ཞིག་ཏུ་བཀག་ཉར་བྱས་ཡོད་པ་ཤེས་རྟོགས་བྱུང་འདུག

འདི་ག་ལྟེ་གནས་ཁང་ལ་གནས་ཚུལ་འབྱོར་དོན། འདི་ལོའི་ཕྱི་ཟླ་ ༢ ཚེས་ ༢༤ ཉིན་གྱི་མཚན་མོར་གྲྭ་ངག་དབང་རྒྱལ་མཚན་རྒྱ་གཞུང་ཉེན་རྟོག་པའི་བཙན་ཁྲིད་བྱས་ཏེ་གར་སོང་ཆ་མེད་དུ་གྱུར་འདུག དེ་ལྟར་ཁོང་གློ་བུར་དུ་བརླག་རྐྱེན་ས་གནས་ཡུལ་མི་རྣམས་ཀྱིས་བརྩད་གཅོད་སྐབས། ནག་ཆུ་ཁུལ་གྱི་ཉེན་རྟོག་ཁང་ཞིག་ཏུ་བཀག་ཉར་བྱས་ཡོད་པ་ཤེས་རྟོགས་བྱུང་འདུག ཁོང་འཇུ་བཟུང་བྱེད་དགོས་པའི་རྒྱུ་མཚན་ཅི་ཡིན་ཤེས་རྟོགས་ཐུབ་ཀྱི་མེད་པ་རེད།

གྲྭ་ངག་དབང་རྒྱལ་མཚན་ནི་ནག་ཆུ་རྫོང་རྟར་ཆེན་ཡུལ་ཚོའི་གོང་སུམ་གྲོང་སྡེ་ནས་ཡིན་པ་དང་། ཁོང་གི་ཕ་མིང་ལ་ཚེ་རིང་མི་འགྱུར་དང་མ་མིང་ལ་མར་འཛིན་ཟེར་ཞིང་རང་ལོ་ ༤༡ ཡིན་འདུག དེ་སྔོན་ཤག་རོང་པོ་དགོན་གྱི་གྲྭ་པ་ཡིན་འདུག དགོན་པའི་སྒྲིག་ཁོངས་སུ་ཡོད་དུས་སྲིད་གཞུང་གི་མི་སྣས་དགོན་པར་ཆབ་སྲིད་སློབ་གསོ་སྤྲོད་སྐབས། སྲིད་གཞུང་གི་མི་སྣ་དང་ཁ་རྩོད་མང་པོ་ཤོར་མྱོང་བ་དང་། རྒྱུ་རྐྱེན་དེ་ལ་རྟེན་ནས་དེ་སྔོན་ཤག་རོང་པོ་དགོན་ལ་ཟླ་ ༥ ཚེས་ ༢༠ ཉིན་གྱི་དོན་རྐྱེན་དུ་སྙད་པའི་ཛ་དྲག་གནས་སྟངས་འོག ཁོང་དགོན་པའི་སྒྲིག་ཁོངས་ནས་ཕྱིར་འཐེན་མི་བྱེད་ཀ་མེད་བྱུང་ཡོད་འདུག

ཁོང་ནི་རྒྱུན་ལྡན་དུ་མི་རིགས་ལ་ཤ་ཞེན་ཆེ་ཞིང་རིག་གཞུང་ལ་དོ་སྣང་ཆེན་པོ་ཡོད་པ་མ་ཟད། ལྷ་བྲིས་ལོ་མང་སྦྱང་ནས་རི་མོའི་སྒྱུ་རྩལ་ལའང་མཁས་པའི་མི་སྣ་ཞིག་ཀྱང་ཡིན་འདུག དགོན་པའི་སྒྲིག་ཁོངས་ནས་ཕྱིར་འཐེན་བྱས་ནས་ད་ལྟའི་བར། ཁོང་སྤྱི་ཚོགས་ནང་གྲྭ་རྐྱང་དཀྱུས་མ་ཞིག་གི་མི་ཚེ་སྐྱེལ་བཞིན་ཡོད་འདུག ཡིན་ནའང་། རྒྱ་གཞུང་མི་སྣས་བཙན་བཀའ་བཏང་སྟེ་ཁོང་སྤྱི་ཚོགས་ཁྲོད་རང་དབང་གིས་འགྲོ་མི་ཆོག་པ་དང་། མི་སྣ་འདྲ་མིན་དང་ཐུག་འཕྲད་བྱས་ཚེ་ཉེས་པ་ཕོག་རྒྱུ་ཡིན་པ་དང་། ཡར་མར་འགྲོ་འདུག་སྐབས་སྲིད་གཞུང་ལ་དགོངས་ཞུ་བྱེད་དགོས་པའི་གཏན་འབེབས་བཟོས་ཏེ། ག་དུས་ཡིན་ཡང་རྒྱ་གཞུང་ཉེན་རྟོག་པས་རྗེས་འདེད་ལྟ་རྟོག་འོག་ཡོད་པ་མ་ཟད། ཐ་ན་ཁ་པར་བརྒྱུད་ནས་རྒྱ་གཞུང་གིས་འབྲེལ་ཡོད་ཀྱིས་ཁོང་ལ་སྡིགས་ར་དང་འཇིགས་སྐུལ་ཡང་ཡང་གཏོང་མྱོང་ཡོད་འདུག